Fana: At a Speed of Life!

የኮንትሮባንድ እንቅስቃሴን ለመከላከል ከ1ሺህ 400 በላይ የጉምሩክ ፖሊሶች ሊሰማሩ ነው

አዲስ አበባ፣ የካቲት 21፣ 2011 (ኤፍ.ቢ.ሲ) የኮንትሮባንድ እንቅስቃሴን ለመከላከል ከ1ሺህ 400 በላይ የጉምሩክ ፖሊሶች ሊሰማሩ መሆኑን የጉምሩክ ኮሚሽን አስታወቃ።

የኮንትሮባንድ ንግድ እንቅስቃሴ በገቢም ሆነ በወጪ ንግዱ ላይ ለሀገሪቱ ተግዳሮት እንደሆነ መቀጠሉን የጉምሩክ ኮሚሽን መረጃ ያመላክታል።

ይህን ችግር በአጭር ጊዜ ውስጥ መፍታት ካልተቻለም ህጋዊ ነጋዴውን ከመስመር እንዲወጣ  በማድረግ ሀገሪቱን ወደ ከፋ ቀውስ ሊያስገባት እንደሚችል ባለሙያዎች ይናገራሉ።

የጉምሩክ ኮሚሽን ኮሚሽነር ደበሌ ቀበታ ከፋና ብሮድካስቲንግ ኮርፖሬት ጋር በነበራቸው ቆይታ በግማሽ አመቱ ብቻ ከግማሽ ቢሊየን ብር በላይ ግምት ያላቸው የተለያዩ እቃዎች ወደ ውጭ ሲወጡ እና ወደ ሀገር ውስጥ ሊገቡ ሲሉ መያዛቸውን ተናግረዋል ።

በያዝነው ዓመትም ህገ ወጥ ንግዱ በሀገሪቱ ተከስቶ የነበረውን አለመረጋጋት እንደ ጥሩ አጋጣሚ በመጠቀምና ቅርፁን በመቀያየር በመላ ሀገሪቱ መስፋፋት መቻሉ ነው የተገለፀው።

በዚህም አልባሳት ፣ የጦር መሳሪያዎች ፣ ጊዜ ያለፈባቸው መድሀኒቶች፣ ሺሻዎች እና የተለያዩ የውጭ ሀገራተ መገበያያ ገንዘቦች  በቁጥጥር ስር መዋላቸውን ኮሚሽነሩ ተናግረዋል ።

በሀገሪቱ ኢኮኖሚ ላይ ጫና እያሳደረ ያለውን ኮንትሮባንድ ለመከላከልም የጉምሩክ ኮሚሽንም አዲስ አወቃቀር በመስራት ላይ የሚገኝ መሆኑ ነው የተገለፀው።

በዚህ መሰረትም የኮንትሮባንድ ወንጀልን መከላከል የሚያስችል አወቃቀር በሁሉም የኮሚሽኑ ፅህፈት ቤቶች፣ መቆጣጠሪያ ጣቢያዎች እና ኬላዎች መዘርጋቱን  ነው  ከሚሽነር ደበሌ የተናገሩት።

በሀገሪቱ ሁሉም አካባቢዎች በሚገኙ 94 ኬላዎች ያሉ ከ100 በላይ ሃላፊዎችም በፖሊስ ኮሚሽን በወጣ ጥብቅ መስፈርት እንደ አዲስ እንዲደራጁ ተደርገዋል ነው ያሉት።

እነዚህ ኬላዎች ወንጀሉን መከላከል የሚያስችል የተደራጀ የሰው ሀይል እንዲኖራቸውም በስነ ምግባራቸው እና በስራ አፈፃፀማቸው የተሻሉ ባለሙያዎችንም መሰማራታቸው ነው የተገለፀው።

የፌዴራል ፖሊስ ኮሚሽን ኮሚሽነር እንደሻው ጣሰው በበኩላቸው ወንጀሉን ለመከላከል የጉምሩክ ፖሊሶችን የማሰልጠን እና የማደራጀት  ስራ መሰራቱን ገልፀዋል ።

እነዚህ ፖሊሶች በተለያዩ ጣቢያዎች ለማሰማራትም በጉሙሩክ ኮሚሽን በኩል የቅድመ ስራዎች መጠናቀቃቸውን አክለዋል ።

በዚህ መሰረትም ከ1ሺህ 400 በላይ የጉምሩክ ፖሊሶች በተለየዩ የጉምሩክ ጣቢያዎችና ኬላዎች የሚሰማሩ መሆኑን ኮሚሽነር ደበሌ ቀበታ ተናግረዋል።

ለእነዚህ ፖሊሶች ስምሪት አስፈላጊ ግብዓቶች መሟላታቸውን የገለፁት ኮሚሽነሩ፥ የኮንትርባንድ ንግድን በመከላከልና በመቆጣጠር ሂደት በየኬላው የሚገኙ ሰራተኞችና ህብረሰቡ ንቁ ተሳታፊ እንዲሆን ጥሪ አቅርበዋል።

በዙፋን ካሳሁን

You might also like
Comments
Loading...