Fana: At a Speed of Life!

5ኛው የኢትዮ-ሱዳን ከፍተኛ የጋራ ኢኮኖሚ ትብብር ጉባኤ በካርቱም እየተካሄደ ነው

አዲስ አበባ፣የካቲት 21፣2011 (ኤፍ.ቢ.ሲ) 5ኛው የኢትዮ-ሱዳን ከፍተኛ የጋራ ኢኮኖሚ ትብብር ጉባኤ  በሱዳን ካርቱም እየተካሄደ ነው።

በጉባኤውም ምክትል ጠቅላይ ሚኒስትር አቶ ደመቀ መኮንንና የሱዳኑ ምክትል ፕሬዚዳንት ዶክተር ኦስማን መሃመድ  የሱፍን ጨምሮ ሌሎች አካላት ተሳትፈዋል።

በመድረኩም ሀገራቱ ያላቸውን የሁለትዮሽ ኢኮኖሚ ግንኙነት ማሳደግ በሚቻልበት ሁኔታ ምክክር መካሄዱ ነው የተገለፀው።

በዚህ ወቅትም  ኢትዮጵያ ከሱዳን ጋር ያላትን ግንኙነት ይበልጥ ለማጠናከር ከፍተኛ ፍላጎት ያላት መሆኑን አቶ ደመቀ መኮንን ገልፀዋል።

ከዚህ ባለፈም ኢትዮጵያ የቀጠናውን ሰላም በዘላቂነት ለማስቀጠል ከሱዳን መንግስት ጋር በቅንጅት በመስራት ላይ የምትገኝ መሆኑን አንስተዋል።

የሱዳን መንግስት ለቀጠናው ሰላም  መረጋጋት ከፍተኛ አስተዋፅኦ ማበርከቱን የገለፁት አቶ ደመቀ በደቡብ ሱዳን ያለው ቀውስ እንዲሻሻል የሚደረገውን ጥረትም አድንቀዋል።

ዶክተር ኡስማን መሃመድ የሱፍ በበኩላቸው ሁለቱ ሀገራት ከመቼውም ጊዜ በበለጠ ግንኙነታቸውን የሚያጠናክሩበት ወቅት መሆኑን ተናግረዋል።

በተለይም ሁለቱ ጎረቤት ሀገራት በግብርናው ዘርፍ ያላቸውን ግንኙነት ለማሳደግ በቅንጅት ሊሰሩ እንደሚገባ  አሳስበዋል።

ምክትል ጠቅላይ ሚኒስትር አቶ ደመቀ መኮንን በ 5ኛው የኢትዮ-ሱዳን ከፍተኛ የጋራ ኢኮኖሚ ትብብር ጉባዔ ላይ ለመሳተፍ በትናንትናው ዕለት ሱዳን ካርቱም መግባታቸው ይታወሳል ።

በአውሮፓውያኑ 2014 ላይ የተጀመረው የኢትዮ-ሱዳን ከፍተኛ የጋራ ኢኮኖሚ ትብብር የሁለቱን ሀገራት ትብብር በተለያዩ ዘርፎች የኢኮኖሚ ውህደትን ዕውን ለማድረግ ያለመ ነው።

 

ምንጭ፦ሱና ኒውስ

 

You might also like
Comments
Loading...