Fana: At a Speed of Life!

የአድዋ ድል የፈነጠቃቸውን ‘የኢትዮጵያኒዝም’ እና ‘የፓን አፍሪካኒዝም’ እሴቶችን ማጎልበት ይገባል – ምሁራን

አዲስ አበባ፣ የካቲት 21፣ 2011 (ኤፍ.ቢ.ሲ) የኢትዮዽያዊያን የአንድነት መገለጫ የሆነውን የጥቁር ህዝቦች ደማቅ ታሪክ የአድዋ ድል በዓልን ከማክበር ባለፈ ድሉ የፈነጠቃቸው ኢትዮጵያኒዝምን እና ፓን አፍሪካኒዝም እሴቶችን ማጎልበት እንደሚገባ ምሁራኑ አስታወቁ።

ከፋና ብሮድካስቲንግ ኮርፖሬት ጋር ቆይታ ያደረጉት የአለም አቀፍ ግንኙነት እና የፓን አፍሪካኒዝም ጉዳይ ተመራማሪዎች የአድዋ ድል ኢትዮጵያውያን ከየአቅጣጫው ለነፃነታቸው የተመሙበት ለሀገራቸው ክብር ህይወታቸውን የሰውበት ነው ብለዋል።

ባለቅኔው ሎሬት ፀገጋዬ ገብረ መድህን ዋ አድዋ የሩቅ ቅርቧ እንዳሉት በዝነኛ ግጥማቸው የካቲት 23 1888 የዛሬ 123 ዓመት ኢትዮጵያዊያን በበርሊን ኮንፈረንስ አፍሪካን ለመቀራመት ውል ያሰሩትን የቄሳር ኃይሎች የዚያ ዘመን  የቅኝ ግዛት ፊታውራሪዎች ህልም ያደበዘዘ ሊቀበሉት የማይቻላቸውን የሀፍረት ማቅ የተከናነቡበት የጦር ውሎ ነው አድዋ።

ለዘመናት ነጮች በጥቁሮች የአይሸነፉም የሚለውን ከንቱ  ሰበካ መሰረት የለሽ አስተምህሮ ጥቁር የታሪክ ምዕራፍ የተቀደደበት የሴራ ፖለቲካ የተጋለጠበት አፍሪካዊያን ብቻ ሳይሆኑ በመላው ዓለም የሚገኙ የነፃነት ታጋዮች ምልክት ሆኗል አድዋ።

በአሜሪካ ኦሃዮ ዩኒቨርሲቲ የሚያስተምሩት ዶክተር ብሩክ በሻህ ከፋና ብሮድካስቲንግ ኮርፖሬት ጋር ከአሁን ቀደም በነበራቸው ቆይታ አድዋን እንዴት በአጭሩ መግለፅ ይቻላል አድዋ እኮ ከጫፍ እስከ ጫፍ የተዘረጋ አዲስ የታሪክ ምዕራፍ የቅኝ ግዛት ቀንበር ወስጥ ወድቀው ለነበሩ የዚያ ዘመን ሀገራት እና መንግስታት ጭቁን ህዝቦች ነፃ እንወጣለን ብለው እንዲያስቡ ተስፋ እንዲሰንቁ ያደረገ ነው ይላሉ።

በደቡብ አፍሪካ እና በብሪታንያ ዩኒቨርሲቲዮች እየተዘዋወሩ የሚያስተምሩት ሌላኛው ኢትዮያጵያዊው ፕሮፌሰር ማሞ ሙጬ ደግሞ አድዋ እኮ አውሮፓውያን ዳግም ቆም ብለው አንዲያስቡ ያስገደዳቸው ለበርካታ ጊዜ ከራሳቸው ጋር ሲሟገቱበት የቆየ የአፍሪካዊያን ድል ነው ብለዋል።

የኦሃዮ ዩኒቨርሲቲው ዶክተር ብሩክ በሻህም የአድዋ ድል ከኢትዮጵያዊያን አልፎ የአፍሪካ ከአፍሪካም አልፎ የጥቁር ህዝቦች ድል ሆኗል ነው የሚሉት።

በኒውዮርክ ግዛት የሀንተር ኮሌጅ  የአፍሪካ እና የፖርታሪኮ ጥናት ክፍል ባልደረባው የሆኑት ፕሮፌሰር ኢሁዱ ኢወሬቦር በስራ አጋጣሚ ወደ ኢትዮጵያ ከአሁን በፊት በመጡበት ወቅት ከፋና ብሮድካስቲንግ ኮርፖሬት ጋር ባደረጉት ቆይታ የአድዋ ድል ላይ በርካታ ጥናቶችን መስራታቸውን ተናገረዋል።

በአድዋ ድል ኢትዮጵያ ብቻ ሳትሆን አፍሪካ ጭምር ለቅኝ ግዛት አድሪጊ ፈጣሪ አውሮፓውያን አይበገሬነትን መልዕክት ያስተላለፉበት ነው ይላሉ።

በመጨረሻም ምሁራኑ የአሁኑ ትውልድ ከቅድመ አያቶቹ መውረስ ያለበት ወሳኝ ነገር አለ ብለዋል።

ወሳኙ ጉዳይም ትብብርን አንድነትን ከዚህም ባለፈ አንድ የሚያደርጉን የታሪክ ምዕራፎች በደማቅ ቀለም መጻፍ መቻል አለባቸው የሚል መልዕክት አስተላልፈዋል።

123ኛው የአድዋ ድል በዓል በሀገር አቀፍ ደረጃ በድምቀት የፊታችን ቅዳሜ የካቲት 23 ይከበራል።

 

በስላባት ማናዬ

You might also like
Comments
Loading...