Fana: At a Speed of Life!

የአሜሪካ ኮንግረስ አባላት የፌደራል ተቋማት እንዳይዘጉ የሚያስችል ጊዜያዊ ስምምነት ደረሱ

አዲስ አበባ ፣ የካቲት 5 ፣ 2011 (ኤፍ ቢ ሲ) የአሜሪካ ኮንግረስ አባላት የፌደራል ተቋማት በድጋሚ እንዳይዘጉ የሚያስችል ጊዜያዊ ስምምነት ደረሱ።

የሃገሪቱ ህግ አውጭዎች ትናንት በዋሽንግተን ባደረጉት ዝግ ስብሰባ በጉዳዩ ላይ በመርህ ደረጃ ተስማምተዋል ነው የተባለው።

የአሁኑ ስምምነት ፕሬዚዳንት ዶናልድ ትራምፕ ሃገራቸው ከሜክሲኮ በምትዋሰነው ድንበር አቅራቢያ ለማስገንባት ላቀዱት መከላከያ የድንበር አጥር የሚሆን ገንዘብ ያስገኝላቸዋል።

በስምምነቱ መሰረት ፕሬዚዳንት ትራምፕ የድንበር አጥር ማስገንቢያ ከጠየቁት 5 ነጥብ 7 ቢሊየን ዶላር ውስጥ 1 ነጥብ 375 ቢሊየን ዶላሩን ያገኛሉ።

ገንዘቡ በደቡባዊው ክፍል በኮንክሪት ግንብ ሳይሆን ተጨማሪ የሽቦ መከላከያ አጥር ለማቆም የሚያስችል ነው።

ፕሬዚዳንት ትራምፕ ሃገራቸውን ከሜክሲኮ በሚያዋስነው ድንበር አቅራቢያ መከላከያ አጥር ለመገንባት 5 ነጥብ 7 ቢሊየን ዶላር መጠየቃቸው ይታወሳል።

ይሁን እንጅ ይህ እቅዳቸው በዴሞክራቶች ተቃውሞን አስተናግዶ ቆይቷል።

ይህን ተከትሎም ገንዘቡ እስከሚገኝ በሚል የፌደራል መስሪያ ቤቶች ለ35 ቀናት በከፊል እንዲዘጉ ወስነው ነበር።

ባለፈው ጥር ወር ደግሞ ፕሬዚዳንቱ በከፊል ተዘግተው የቆዩ የመንግስት መስሪያ ቤቶች እንዲከፈቱ መስማማታቸው ይታወሳል።

ለዚህ የሚሆን ገንዘብም ለሶስት ሳምንት የመደቡ ሲሆን፥ ይህ ስምምነት የፊታችን ዓርብ ይጠናቀቃል።

ትናንት ምሽትም ቀኑ ከመድረሱ ቀደም ብሎ የሪፐብሊካን እና ዴሞክራት ተደራዳሪዎች ተወያይተው፥ የፌደራል ተቋማት እንዳይዘጉ ለትራምፕ የድንበር መከላከያ አጥር ግንባታ ድጋፍ ለማድረግ ስምምነት ደርሰዋል።

በጊዜያዊነት የተደረሰው ስምምነት ከድንበር አጥር ግንባታው ባለፈ ለፌደራል ተቋማት ስራ ማስኬጃ ገንዘብ የሚፈቅድ ሲሆን፥ ዝርዝር ጉዳዮች ግን አልወጡም።

አሁን በጊዜያዊነት የተደረሰው ስምምነት ገቢራዊ እንዲሆን ግን የፊታችን ዓርብ መፅደቅ ይኖርበታል።

በስምምነቱ ዴሞክራቶቹ የትራምፕ አስተዳደር ህገ ወጥ ናቸው በሚል በቁጥጥር ስር ካዋላቸው ስደተኞች መካከል የተወሰኑትን እንዲለቅ ይፈልጋሉ።

 

ምንጭ፦ ሬውተርስ

You might also like
Comments
Loading...