Fana: At a Speed of Life!

የተባበሩት አረብ ኢሚሬቶች በየመን ለሚገኙ ታጣቂዎች የጦር መሳሪያ ድጋፍ እያደረገች መሆኑ ተገለፀ

 

አዲስ አበባ፣ጥር 30፣2011 (ኤፍ ቢ ሲ) የተባበሩት አረብ ኢሚሬቶች በየመን ለሚገኙ ታጣቂዎች ዘመናዊ የጦር መሳሪያ ድጋፍ እያደረገች መሆኑ ተገለፀ።

አምነስቲ ኢንተርናሽናል በዛሬው ዕለት  ባወጣው ሪፖርት  የተባበሩት አረብ ኢሚሬቶች  በየመን የሚገኙ ታጣቂ ቡድኖችን ዘመናዊ  የጦር መሳሪያ እያስታጠቀች መሆኑን አስታውቋል።

ለታጣቂዎች ከሚደርስ  የጦር መሳሪያዎች ውስጥም  ሞርታሮች፣ ዘመናዊ  ጠብ መንጃዎች፣ የጦር መሳሪያ ማጓጓዣ መኪኖችና የተለያዩ  መሳሪያዎች መሆናቸው በሪፖርቱ ተመላክቷል።

የጦር መሳሪያዎቹ በምዕራባውያን ሀገሮች የተመረቱ ሲሆን፥ ለታጣቂቆች የሚደርሱበት መንገድም ህጋዊ መሰረት የሌለው መሆኑ ነው የተገለፀው።

የጦር መሳሪያ  ድጋፉ ህገ ወጥ ከመሆኑ ባሻገርም ድጋፍ የሚደረግላቸው ታጣቂዎች በጦር ወንጀል  የተከሰሱና ተቀባይነት የሌላቸው መሆኑ ተገልጿል።

ሪፖርቱን ተከትሎም የጦር መሳሪያው በምን መልኩና ለየትኞቹ ታጣቂዎች እያደረሰ መሆኑን የሚመለከታቸው አካላት ሊያጣሩት የሚገባ ጉዳይ መሆኑን  የአሜሪካ  ባለስልጣናት አስታውቀዋል።

የተባበሩት ዓረብ ኢሚሬቶች በበኩሏ በቀረበባት ክስ ላይ አስተያየት ከመስጠት የተቆጠበች ሲሆን፥ ከአሜሪካ የምታስገባቸውን የጦር መሳሪያዎችም  የሽያጭ  ህግና ደንቡን ያልጣሱ መሆኑን አስታውቃለች።

የተባበሩት ዓረብ አሚሬቶች በየመን ከሚገኘው ሳዑድ መራሹ ጦር ጋር በመተባተበር በሀገሪቱ መንግስት ላይ የሚቃጡ ጥቃቶችን ስታከሽፍ መቆየቷ ይታወቃል።

በየመን ከፈረንጆቹ 2015 ጀምሮ  በተፈጠረው የእርስ በርስ ግጭት እስካሁን የ6 ሺህ 800 ሰላማዊ ዜጎች ህይዎት ያለፈ ሲሆን፥ 10 ሺህ 700 የሚሆኑ ዜጎች ደግሞ ለከፍተኛ ጉዳት መዳረጋቸውን የተባበሩት መንግስታት ድርጅት መረጃ ያመላክታል ።

ከዚህ ባለፈም በጦርነቱ ሳቢያ በተፈጠረ  የበሽታ ወረርሽኝና ረሃብ ምክንያት በብዙ ሺህዎች የሚቆጠሩ ዜጎች  ለህልፈት ተዳርገዋል።

 

ምንጭ ፦ቢቢሲ

You might also like
Comments
Loading...