Fana: At a Speed of Life!

የሶማሌ ክልል በተረጋጋና ሰላማዊ ሁኔታ ላይ እንደሚገኝ የክልሉ መንግስት ገለጸ

አዲስ አበባ፣ የካቲት 1፣ 2011 (ኤፍ.ቢ.ሲ) የሶማሌ ክልል በተረጋጋና ሰላማዊ ሁኔታ ላይ እንደሚገኝ  የክልሉ መንግስት አስታወቀ፡፡

የሶማሌ ክልል  ምክትል ርዕሰ መስተዳድር  አቶ ሙስጠፋ መሃመድ  የክልሉን የ6 ወራት የስራ አፈፃፀም ለክልሉ ምክር ቤት አቅርበዋል።

ከሪፖርቱ በኋላ ዛሬ ለጋዜጠኖች በሰጡት መግለጫ እንዳሉት፥ የሶማሌ ክልል ህዝብ ለኢትዮጵያዊነቱ በከፈለው መስዕዋትነት የመጣውን ለውጥ ለማስቀጠል ክልሉ ከመቸውም ጊዜ በላይ ትኩረት ሰጥቶ ይሰራል፡፡

በመግለጫቸው ምክር ቤቱ ባለፉት 6 ወራት በክልሉ የተከናወኑ ጠንካራና ደካማ ጎን ለይቶ መወያየቱን ተናግረዋል።

ከዚህ በፊት በክልሉ የነበረውን አስተዳደር መዋቅር አሳታፊ በሆነ መንገድ ለማስተካከል የተሰራውን ስራ ምክር ቤቱ በአድናቆት  መመልከቱንም ነው የተናገሩት።

በክልሉ የመናገር ነፃነትና ሰብዓዊ መብት መከበር በተመለከተ የተሰሩ ስራዎችም በጠንካራ ጎን መታየታቸውን ነው የገለጹት፡፡

ከኦብነግ አባላት ጋር በተደረጉ ውይይቶች ወደ ሰላማዊ የትግል አቅጣጫ ለማምጣት የተደረጉ ጥረቶች በአወንታ የሚጠቀሱ ናቸው ብለዋል፡፡

በክልሉ በፀጥታው ዘርፍ በተከናወኑ የማሻሻያ ስራዎች የጎሳና የብሄር ግጭቶችን ለማስወገድ በክልሉ መንግስትና በሀገር ሽማግሌዎች የተደረገውን ጥረትም አንስተዋል፡፡

በዚህም ከ30 የማያንሱ የጎሳና የብሄር ግጭቶችን ማስቀረት ተችሏል ነው ያሉት ምክትል ርዕሰ መስተዳድሩ።

በድንበር አካባቢ የሚከሰቱ ግጭቶችን ለማስቆም የተከናወኑ ተግባራትና ባለፉት አራት ወራት በክልሉ ሙስና እና ብልሹ አሰራሮችን በማስወገድ ረገድ ውጤት ማምጣት ተችሏልም ነው ያሉት።

በዚህም 119 ግለሰቦችን እና 4 ኩባንያዎችን ተጠያቂ የማድረግ 60 የሂሳብ ደብተሮችን እንዳይንቀሳቀሱ መታገዳቸውንም አስረድተዋል፡፡

ከዚህ ባለፈም ከሃምሌ 28 እስከ 30 ቀን 2011 ዓ.ም ድረስ በጅግጅጋና አካባቢዋ በተከሰተው ሁከት በመሳተፍና በማደራጀት የተጠረጠሩ ግለሰቦች በህግ ተጠያቂ መሆናቸውንም ጠቅሰዋል፡፡

በክልሉ በጅግጅጋ ከተማና አንዳንድ አካባቢዎች የሚታዩ የመሬት ወረራዎች ደግሞ በክፍተት የተነሱ ናቸው ብለዋል።

በተጨማሪም የግጭት አዝማሚያዎችን በመለየት ቀድሞ እርምጃዎችን መውሰድ ላይ ክፍተቶች እንዳሉ መገምገሙን አውስተዋል።

 

በሃብታሙ ተክለስላሴ

You might also like
Comments
Loading...