Fana: At a Speed of Life!

በኦዲት ግኝት ላይ ምላሽ በማይሰጡ ተቋማት ላይ እርምጃ ሊወሰድ ነው

አዲስ አበባ፣ የካቲት 21፣ 2011 (ኤፍ.ቢ.ሲ) በዋና ኦዲተር መስሪያ ቤት በኦዲት ግኝት ላይ ምላሽ በማይሰጡ ተቋማት ላይ እርምጃ እንደሚወስድ የአዲስ አበባ ከተማ አስተዳደር አስታወቀ፡፡

የአዲስ አበባ ከተማ አስተዳደር ዋና ኦዲተር ወይዘሮ ፅጌወይን ካሳ ዛሬ በሰጡት ጋዜጣዊ መግለጫ የከተማ አስተዳደሩ በከተማው ምክር ቤት በፀደቀው አዋጅ መሠረት ምላሽ በማይሰጡ ተቋማት ላይ እርምጃ እንደሚወስድ ገልጸዋል፡፡

ከ2003-2007ዓ.ም በዋና ኦዲተር መስሪያ ቤት በ77 ተቋማት ላይ ከተደረገው ኦዲት ውስጥ 57ቱ ምላሽ የሰጡ ሲሆን÷ ቀሪዎቹ 20 ተቋማት በተደጋጋሚ ቢጠየቁም ምልሽ እንዳልሰጡ ተናግረዋል፡፡

ከዚህም ሌላ ከ2008-2010ዓ.ም ኦዲት ከተደረጉ ተቋማት መካከል 56ቱ ምላሽ ያልሰጡ መገኘታቸውንም አንስተዋል፡፡

የዋና ኦዲተር መስሪያ ቤት ተቋማቱ በከተማ ምክር ቤት በተገለፀው አዋጅ መሠረት እስከ የካቲት 24ቀን 2011ዓ.ም የሁለት ወር የጊዜ ገደብ ሰጥቶ ምላሽ እንዲሰጡ እየተጠባበቀ እንደሆነ እና በተገለፀው ጊዜ ውስጥ ምላሽ የማይሰጡ ከሆነ በህግ ተጠያቂ እንደሚሆኑ ወይዘሮ ፅጌወይን ገልጸዋል፡፡

የውበትና መናፈሻ አስተዳደር ኤጀንሲ፣ የጉለሌ የዕፅዋት ማዕከል፣ እንጦጦ ፖሊ-ቴክኒክ ኮሌጅ፣ የዘውዲቱ መታሰቢያ ሆስፒታልና የአዲስ አበባ ከተማ አስተዳደር ትምህርት ቢሮ ተመላሽ ያልተደረገ የቅድመ ክፍያ ሂሳብ 26 ሚሊዮን 500 ሺ ብር ግኝት ተገኝቷል ብለዋል፡፡

ከደንብና መመሪያ ውጪ አበልና ደመወዝ በመክፈል ረገድም 11 ተቋማት ከመመሪያ ውጭ 3 ሚሊዮን 397ሺ 668 ብር አበል መክፈላቸውንና ስድስት ተቋማት 2 ሚሊዮን 300 ሺህ 833 ብር ደመወዝ ያለአግባብ ከፍለው መገኘታቸውን በምርመራ መረጋገጡን የአዲስ አበባ ከተማ ከንቲባ ጽህፈት ቤት መረጃ ያመለክታል።

 

You might also like
Comments
Loading...