Fana: At a Speed of Life!

በኢንዱስትሪ ፓርኮች ውስጥ የሚሰሩ ሰራተኞች የሚያጋጥሟቸውን ችግሮች ለመፍታት እየተሰራ መሆኑ ተገለፀ

አዲስ አበባየካቲት 21፣2011 (ኤፍ.ቢ.ሲ) በሀገሪቱ ኢንዱስትሪ ፓርኮች ውስጥ ተቀጥረው የሚሰሩ ሰራተኞች የሚያጋጥሟቸውን ችግርች ለመፍታት እየተሰራ መሆኑን የኢንዱስትሪ ፓርኮች ልማት ኮርፖሬሽን አስታወቀ።

የኢንዱስትሪ ፓርኮች ልማት ኮርፖሬሽን በዛሬው ዕለት ከሁሉም የከተማ አስተዳድሮችና ከሚመለከታቸው ባለድርሻ አካላት ጋር በፓርኮች ልማት ዙሪያ እና ችግሮቻቸው ላይ ውይይት አድርገዋል ።

በውይይቱም በኢንዱስትሪ ፓርኮች የሚሰሩ ሰራተኞች በደመወዝ ማነስ፣ በመኖርያ ቤት እጦትና በትራንስፖርት ችግር ሰራተኞች በኢንዱስትሪ ፓርኮች ከአንድ ዓመት የዘለለ ቆይታ እንዳይኖራቸው ማድረጉ ነው የተገለፀው።

እነዚህን ችግሮች ለመፍታትም ኮርፖሬሽኑ ከሚመለከታቸው የከተማ መስተዳድሮች ጋር እየሰራ መሆኑን የኢንዱስትሪ ፓርኮች ኮርፖሬሽን የኢንዱስትሪ ፓርኮች ኦፕሬሽንና ማኔጅመንት  ምክትል ዋና ስራ አስፈፃሚ  አቶ  ሽፈራው ሰለሞን ተናግረዋል ።

የመኖሪያ ቤት ችግርን ለመቅረፍ በአቅራቢያ በሚገኙ ከተማዎች መኖሪያ ቤቶችን ለመገንባት  ከባለሃብቶችና ከከተማ አስተዳድሮች ጋር በመተባበር እየተሰራ መሆኑን ጠቁመዋል።

ከዚህ ባለፈም ኢንዱስትሪ ፓርኮቹ አትራፊ በሚሆኑበት ጊዜ ለሰራተኞችም ተመጣጣኝ የደመወዝ ጭማሪ እንዲያደርጉ አቅጣጫ መቀመጡን ገልፀዋል ።

ይህም በዋነኛነት የመኖሪያ ቤትና የትራንስፖርት አገልግሎት ችግራቸውን በተወሰነ መልኩ ለመፍታት የሚያስችል መሆኑን ጠቁመዋል።

በሌላ በኩል በሀገሪቱ በተለያዩ አካባቢዎች በመገንባት ላይ ባሉ የኢንዱስትሪ ፓርኮች የውሃና የኤሌክትሪክ አቅርቦት እንዲሁም የትራንስፖርት ችግር ዋናኛ ማነቆ መሆናቸው ተገልጿል።

እነዚህን በፓርኮቹ ግንባታ ላይ የሚስተዋሉ ችግሮችን ለመፍታትም ድርጅቱ ከሚመከከታቸው የከተማ አስተዳድሮች ጋር  እየተሰራ መሆኑ በውይይት መድረኩ ላይ ተነስቷል።

በታሪክ አዱኛ

You might also like
Comments
Loading...