Fana: At a Speed of Life!

በተጋቡ በሶስት ደቂቃ ውስጥ የተፋቱት ጥንዶች

አዲስ አበባ፣ የካቲት 1፣2011 (ኤፍ ቢ ሲ) ትዳራቸውን ለመመስረት ቃል ኪዳን በፈፀሙ በሶስት ደቂቃ ውስጥ የተለያዩት ጥንዶች ጉዳይ አነጋጋሪ ሆነዋል ።

ጋብቻ በብዙ ሰዎች ዘንድ ትልቅ ስፍራ የሚሰጠው ከመሆኑም በላይ የህይዎት አንዱና ትልቁ ምዕራፍ መሆኑ ብዙዎችን ያስማማል።

ይሁን እንጅ አንዳንድ ሰዎች ሰርጋቸውን በሚያከናውኑበት ቀን የተለያዩ ችግሮች ሲያጋጥማቸው ይስተዋላል።

በሀገራችን በተለያዩ የተሽከርካሪና መሰል አደጋዎች ምክንያት የሰርጋቸው ቀን የተበላሸባቸው ሙሽራዎችን ማስታወስ ይቻላል።

በሀገረ ኩዌት የተከሰተው ግን ከዚህ የተለየ ነው።

ነገሩ እንዲህ ነው፣ ሙሽሪትና ሙሽራው በጉጉት ሲጠብቁት የነበረው የሰርጋቸው ቀን ደርሶ የትዳር ቃል ኪዳናቸውን ለማሰር ወደ ፍርድ ቤት ያመራሉ።

ቃል ኪዳናቸውን ከፈፀሙ በኋላም ወደ ሰርግ ስነ ስርዓቱ ለማቅናት ከፍርድ ቤቱ ወጥተው መንገዳቸውን ይጀምራሉ።

በዚህ ወቅትም ሙሽሪት አንዳች ነገር አደናቅፏት ትወድቃለች፤ ይህን ተከትሎም ሙሽራው ሙሽሪትን ከመደገፍና ከመንከባከብ ይልቅ አስገራሚ ነገር ያደርጋል።

በወቅቱ በድንጋጤ ውስጥ የነበረችውን ሙሽሪት ደደብ በማለት ይሰድባታል።

በስድቡ እጅግ የተከፋችው ሙሽሪትም በቅፅበት አንድ ውሳኔ ትወስናለች።

ቃል ኪዳን ወደ ፈፀሙትበት ፍርድ ቤት በመመለስ ዳኛው ከሶስት ደቂቃ በፊት የፈፀሙትን ጋብቻ እንዲሰርዝላት ትጠይቃለች።

በዚህም ጥንዶቹ የጋብቻ ቃል ኪዳናቸውን በፈፀሙ በሶስት ደቂቃ ልዩነት ውስጥ ጋብቻቸውን መሰረዛቸው ነው የተነገረው።

ይህም በኩዌት ሀገር የመጀመሪያውና አጭሩ የጋብቻ ቆይታ ሳይሆን እንደማይቀር በዘገባው ተመላክቷል።

ምንጭ ፦ ኦዲቲ ሴንትራል

You might also like
Comments
Loading...