Fana: At a Speed of Life!

ፕሬዚዳንት ዶናልድ ትራምፕ በመንግስት ተቋማት መዘጋት ዙሪያ ሲደረግ የነበረውን ስብሰባ ረግጠው ወጡ

አዲስ አበባ፣ ጥር 02፣ 2011 (ኤፍ.ቢ.ሲ) የአሜሪካው ፕሬዚዳንት ዶናልድ ትራምፕ በከፊል በተዘጉ የመንግስት ተቋማት ዙሪያ ከዴሞክራቲክ መሪዎች ጋር ሲያደርጉ የነበረውን ስብሰባ ረግጠው መውጣታቸው ተነግሯል።

የሪፐብሊካኑ ፕሬዚዳንት ዶናልድ ትራምፕ ስብሰባውን ረግጠው የወጡት የዴሞክራቶቹ ናንሲ ፔሎሲ እና ቻክ ስኩመር ፕሬዚዳንቱ በአሜሪካ እና ሜክሲኮ ድንበር ላይ ለመገንባት ላሰቡት የግንብ አጥር የጠየቁትን ፈንድ በመቃወማቸው ነው።

ፕሬዚዳንት ትራምፕ ከሁለቱ የዴሞክራት መሪዎች ጋር የነበራቸውን ስብሰባም “በአጠቃላይ ጊዜ ማባከን ነበር” ሲሉም ገልፀዋል።

ፕሬዚዳንቱ በአሜሪካ እና ሜክሲኮ ድንበር ላይ ለመገንባት ላሰቡት የግንብ አጥር የጠየቁት ገንዘብ በዴሞክራቶች ውድቅ መሆኑን ተከትሎ የሀገሪቱ የመንግስት ተቋማት በከፊል ዝግ ተደርገው ቆይተዋል።

የመንግስት ተቋማትን መዝጋት ከተጀመረ ወዲህ 800 ሺህ የሚሆኑ የፌደራል መንግስት ሰራተኞች በዚህ ሳምንት ለመጀመሪያ ጊዜ ያለክፍያ እንዲቆዩ እንደሚደረግም ታውቋል።

የመንግስት ተቋማትን ስራ ለማስጀመር ያለመው የትናንትናው የፕሬዚዳንት ትራምፕ እና የዴሞክራቶች ስብሰባም ምንም ስምምነት ላይ ሳይደረስ ነበር ፕሬዚዳንት ትራምፕ ስብሰባውን ረግጠው የወጡት።

ፕሬዚዳንት ትራምፕ ከስብሰባው በኋላ በትዊተር ገፃቸው ላይ ባሰፈሩት ጽሁፍ ለዴሞክራት ፓርቲ አመራሮች “ቻው” ብለው ጽፈዋል።

የአሜሪካው ፕሬዚዳንት ዶናልድ ትራምፕ በሜክሲኮ ድንበር ላይ ለመገንባት ላሰቡት የግንብ አጥር የጠየቁት ገንዘብ ካልተፈቀደ የመንግስት ተቋማትን ለወራት አሊያም ለዓመታት በከፊል ዝግ እንደሚያደርጉ ማስታወቃቸው ይታወሳል።

የመንግስት ተቋማት በከፊል ዝግ ከተደረጉም ዛሬ 19ኛ ቀኑን ማስቆጠሩም ነው የተነገረው።

ምክንያቱ ደግሞ አሜሪካ በስተደቡብ አቅጣጫ ከሜክሲኮ ጋር የሚያዋስናትን ድንበር በግንብ ለማጠር ፕሬዚዳንት ዶናልድ ትራምፕ የጠየቁት ከ5 ቢሊየን የአሜሪካ ዶላር በላይ ገንዘብ በዴሞክራቶች በኩል ተቃውሞ ቀርቦበት ባለመጽደቁ ነው።

ምንጭ፦ www.bbc.com

You might also like
Comments
Loading...