Fana: At a Speed of Life!

ፕሬዚዳንት ኪምና ትራምፕ ዳግም ለሚያደርጉት ውይይት ቻይና የበኩሏን ሚና እንደምትወጣ አስታወቀች

አዲስ አበባ ጥር 2፣ 2011 (ኤፍ.ቢ.ሲ) የሰሜን ኮርያው ፕሬዚዳንት ኪም ጆንግ ኡንና የአሜሪካው አቻቸው ዶናልድ ትራምፕ ዳግም ለሚያደርጉት ውይይት ቻይና የበኩሏን ሚና እንደምትወጣ አስታወቀች፡፡

ባሳለፍነው ፈረንጆች ሰኔ ወር ፕሬዚዳንት ትራምፕና ፕሬዚዳንት ኪም ለመጀመሪያ ጊዜ መገናኘታቸውን የሚታወስ ሲሆን፥ በሁለቱ ሀገራት መካከል ይነሳ የነበረው የኒውክሌር የጦር መሳሪያ ጉዳይ በሰላማዊ መንገድ ለመፍታት የሚያስችል ሁኔታ መፈጠሩ ይነገራል፡፡

ፕሬዚዳንት ኪም ጆንግ ኡን በዚህ ሳምንት በቻይና የሶስት ቀናት ይፋዊ የስራ ጉብኝት ካደረጉ በኋላ የቻይና መገናኛ ብዙኀን የሰሜን ኮሪያና የአሜሪካ መሪዎች ዳግም ፊትለፊት ሊገናኙ ይችላሉ ተብሎ እንደሚጠበቅ መዘገባቸው ተነግሯል፡፡

በዚህም ሁለቱ ሀገራት የጀመሩትን የሰላም ሂደት ለማሳካት ለሚያደረጉት ጥረት ቻይና የበኩሏን ድጋፍ እንደምታደርግ ፕሬዚዳንት ሺ ጂፒንግ ተናግረዋል፡፡

የኮሪያ ልሳነ ምድርን ከኒውክሌር የጦር መሳሪያ ነፃ ለማድረግና ሰላም ለማስፈን ቻይና ገንቢና አወንታዊ አስተዋጽዖ ለማበርከት ያላትን ዝግጁነት ፕሬዚዳንት ሺ ጂፒንግ መግለፃቸው ነው ዘገባው ሽንዋ የዜና ወኪል ጠቅሶ የዘገበው፡፡

ቻይና የሰሜን ኮሪያ ዋና አጋርና በንግድ ግንኙነት ተሳሰረች መሆኗ ይነገራል፡፡

በዚህም ፕሬዚዳንት ኪም ከሀገር ውጭ የመጀመሪያውን የስራጉብኝት በሳለፍነው የፈረንጆቹ ዓመት በቻይና ማድረጋቸው ይታወሳል፡፡

ፕሬዚዳንት ኪም ለቻይናው ፕሬዚዳንት ሺ ጂፒንግ ሀገራቸውን እንዲጎበኙ ግብዣ ማቅረባቸው ታውቋል፡፡

ምንጭ፦ቢቢሲ

You might also like
Comments
Loading...