Fana: At a Speed of Life!

ጠ/ሚ ዶክተር አብይ በተለያዩ ሃገራት ከሚገኙ የኢትዮጵያ አምባሳደሮች ጋር ተወያዩ

አዲስ አበባ ፣ ጥር 6 ፣ 2011 (ኤፍ ቢ ሲ) ጠቅላይ ሚኒስትር ዶክተር አብይ አህመድ በተለያዩ ሃገራት ከሚገኙ የኢትዮጵያ አምባሳደሮች ጋር ተወያዩ

ውይይቱ በኢትዮጵያ የውጭ ጉዳይ ፖሊሲ ዙሪያ ያተኮረ ነው ተብሏል።

በተጨማሪም በዓለም አቀፍ፣ በአህጉራዊ እና ሃገራዊ ጉዳዮች ላይ ያተኮረ እንደነበርም ነው የተገለጸው።

በውይይቱ ወቅት ጠቅላይ ሚኒስትሩ የኢትዮጵያ የውጭ ጉዳይ ፖሊሲን ጠንካራና ደካማ ጎኖች አንስተዋል።

ጠቅላይ ሚኒስትሩ እንደ ዲፕሎማት ዓለም አቀፋዊ አዝማሚያዎችን በመረዳት በኢትዮጵያ የውጭ ግንኙነት ፖሊሲ ላይ የተመሰረተ ሀሳብና አሠራር መመስረት አስፈላጊ መሆኑን በዚህ ወቅት ተናግረዋል።

ከዚህ ባለፈም ዲፕሎማቶች የመንግስት ፖሊሲን የመተግበር፣ የሚመደቡበትን ሃገር ፖሊሲ የመገንዘብና በሃገራቱ የሚኖሩ ኢትዮጵያውያንን መብት የማስጠበቅ ሚና እንዳላቸውም አስታውሰዋል።

በተጨማሪም አሁን ላይ ከተደረሰበት ዓለማዊ፣ አህጉራዊና ሃገራዊ ሁኔታዎች አንጻር ሊሻሻሉ ይገባቸዋል ያሏቸውን ጉዳዮች አብራርተዋል።

የሃገሪቱን የውስጥ ችግር በተገቢው መንገድ መፍታት በውጭ ለሚሰራ የዲፕሎማሲ ስራ ትልቅ አቅም እንደሆነም አስረድተዋል።

ዲፕሎማቶችም የራሳቸውን አቅም በማጠናከር ውጤታማ ሊሆኑ እንደሚገባም አስገንዝበዋል::

ውይይቱ በውጭ ጉዳይ ሚኒስቴርና በኢትዮጵያ የውጭ ግንኙነት ፖሊሲ የተደረጉ ለውጦችን ለመገምገም ያቀደ ነው።

 

መረጃው የጠቅላይ ሚኒስትር ፅህፈት ቤት ነው

 

You might also like
Comments
Loading...