Fana: At a Speed of Life!

ግምታዊ ዋጋቸው ከ937 ሺህ ብር በላይ የሆኑ የኮንትሮባንድ ዕቃዎች በቁጥጥር ስር ዋሉ

አዲስ አበባ፣ ጥር 03፣ 2011 (ኤፍ ቢ ሲ) ግምታዊ ዋጋቸው 937 ሺህ 912 ብር የሆኑ የኮንትሮባንድ ዕቃዎች በቁጥጥር ስር መዋላቸውን የገቢዎች ሚኒስቴር አስታወቀ።

በሚኒስቴሩ የጉምሩክ ኮሚሽን የድሬዳዋ ጉምሩክ ቅርንጫፍ ጽሕፈት ቤት እንደገለጸው፥ አዳዲስና የተለበሱ ጨርቆችን ጨምሮ የተለያዩ ሲጋራዎች በቁጥጥር ስር ውለዋል።

የኮንትሮባንድ ዕቃዎቹ በግመል ጭነት ተጓጉዘው ድሬዳዋ ዩኒቨርሲቲ ጀርባ በተለምዶ መርመርሳ ተብሎ በሚጠራ አካባቢ በተራገፉበት ወቅት በጉምሩክ ሠራተኞች፣ በፌደራል ፖሊስ እና በድሬዳዋ አድማ ብተና ፖሊሶች በተደረገ ክትትል በቁጥጥር ስር ውለዋል ነው የተባለው።

በተያያዘ ዜና ግምታዊ ዋጋቸው 375 ሺህ ብር የሆኑ 30 በሬዎች በህገ ወጥ መንገድ ከኢትዮጵያ ወደ ሶማሌ ላንድ ሊወጡ ሲሉ በፌደራል ፖሊስ በቁጥጥር ሥር መዋላቸው ተገልጿል።

ኢትዮጵያ በኮንትሮባንድ ንግድ ምክንያት ከቀንድ ከብቶች የወጪ ንግድ ማግኘት ያለባትን ገቢ እያጣች መሆኑም ከሚኒስቴሩ ያገኘነው መረጃ ያመላክታል።

ስለሆነም ህብረተሰቡ ማንኛውንም አይነት ህገ ወጥ የንግድ እንቅስቃሴን ሲመለከት ለሚመለከተው አካል በመጠቆም የበኩሉን ድርሻ ሊወጣ እንደሚገባም ጥሪ ቀርቧል።

 

 

You might also like
Comments
Loading...