Fana: At a Speed of Life!

የፈጠራ ሃሳቦችንና ስራዎችን በአለም አቀፍ ደረጃ በነፃ ለመመዝገብ የሚያስችል ስምምነት ተፈረመ

አዲስ አበባ፣ ታህሳስ 30፣ 2011 (ኤፍ.ቢ.ሲ) የኢትዮጵያውያንን የፈጠራ ሃሳቦችንና ስራዎችን በአለም አቀፍ ደረጃ በነፃ ለመመዝገብ የሚያስችል ስምምነት ተፈረመ፡፡

‹‹ሴቭ አይዲያ›› የተሰኘው ድርጅት የኢትዮጵያ የፈጠራ ስራዎችን ለመመዝገብና ጥበቃ ለማድረግ የሚያስችለውን ስምምነት ከኢኖቬሽንና ቴክኖሎጂ ሚኒስቴር ጋር ተፈራርሟል፡፡

ስምምነቱን የተፈራረሙት የኢኖቬሽንና ቴክኖሎጂ ሚኒስቴር ሚኒስትር ዴኤታ ዶክተር ሹመቴ ግዛው ‹‹በዲዛይን ኢትዮጵያ›› ውድድር ወቅት የቀረቡ የኢትዮጵያውን የፈጠራ ሃሳቦች አለም አቀፍ እውቅና ኖሯቸው እንዲጠበቁና ወደ ስራ እንዲገቡ ኢኖቬሽንና ቴክኖሎጂ ሚኒስቴር ፍላጎት እንዳለው ተናግረዋል፡፡

የ‹‹ሴቭ አይዲያ›› ፕሬዚዳንቱ ፕሮፌሰር ሃዝቦ ሾኮ በበኩላቸው ‹‹ሴቭ አይዲያ››የአፍሪካ ቢሮውን ኢትዮጵያ ውስጥ እንደሚከፍት ተናግረዋል፡፡

ይህ ድርጅት በአለም አቀፍ ደረጃ ያሉ የፈጠራ ስራዎችን በነፃ የሚመዘግብ፣ የሚጠብቅ፣ ሃሳቦቹ ወደ ስራ እንዲገቡ ከባለሃብቶች ጋር የማገናኘት ስራ የሚሰራና ራሱም የገንዘብ ድጋፍ የሚያደርግ መሆኑንም የኢኖቬሽንና ቴክኖሎጂ ሚኒስቴር መረጃ ያመለክታል፡፡

ስራዎቹን ኦንላይን ለህዝብ ክፍት በማድረግ እንዲተዋወቁ የማድረግ ስራ የሚሰራው ድርጅቱ በአፍሪካ ውስጥ ደቡብ አፍሪካ፣ ታንዛኒያ፣ ኬንያ፣ አይቮሪኮስትና ቦትስዋና እንደሚሰራም ተነግሯል፡፡

You might also like
Comments
Loading...