Fana: At a Speed of Life!

የደቡብ ዞን የኦነግ ጦር የጉጂ አባ ገዳዎች ያቀረቡለትን የሰላም ጥሪ ተቀበለ

አዲስ አበባ፣ ጥር 7፣ 2011 (ኤፍ.ቢ.ሲ) የደቡብ ዞን የኦሮሞ ነፃነት ግንባር ጦር የጉጂ ኦሮሞ አባ ገዳዎች ያቀረቡለትን የሰላም ጥሪ መቀበሉ ተነግሯል።

የጉጂ ዞን የኦነግ ጦር አዛዥ ኤሊያስ ጋምቤላ ጎሎ የጉጂ አባ ገዳዎች ባወጁት የሰላም ሳምንት ወቅት ያቀረቡለትን የሰላም ጥሪ በትናንትናው እለት ተቀብሎ ወደ ሰላማዊ ትግል መመሰሉም ታውቋል።

የጉጂ አባ ገዳ ጂሎ መንኦ እንደተናገሩት፥ በጉጂ እና ምእራብ ጉጂ ዞን በተለያዩ ደረጃዎች ላይ የሚገኙ የኦሮሞ ነፃነት ግንባር ጦር አመራሮች የቀረበላቸውን የሰላም ጥሪ በመቀበል ወደተዘጋጀላቸው ማረፊያዎች በመግባት ላይ ይገኛሉ።

አባ ገዳዎች ከመንግስት ጋር በነበራቸው ውይይት በተደረሰው ስምምነት መሰረትም የዞኑ የኦሮሞ ነፃነት ግንባር ጦር ወደተዘጋጀላቸው አራት ካምፖች ነው በመግባት ላይ ይገኛሉ ብለዋል።

በመንግስት በኩል ያለውን ቀሪ ጉዳይም የአባ ገዳዎች ከመንግስት ጋር በመመካከር የሚጨርሱ መሆኑንም አባ ገዳ ጂሎ መንኦ አስታውቀዋል።

የጉጂ አባ ገዳዎች ባሳለፍነው ሳምንት አውጀውት የነበረው የሰላም ሳምንት በዚህኛው ሳምንትም እንዲቀጥል መወሰኑን አባ ገዳ ጂሎ መንኦ ገልፀዋል።

ባሳለፍነው ሳምንት ታውጆ በነበረው የሰላም ሳምንትም ከፍተኛ ጥቅም ማስገኘቱንም አባ ገዳ ጂሎ መንኦ አክለው ተናግረዋል።

ማንኛውም የፖለቲካ ሀይል መንግስት ባመቻቸው የሰላማዊ ትግል መንገድ ብቻ መታገል አለበት ሲሉም የጉጂ አባ ገዳዎች አስታውቀዋል።

ከሰላማዊ ትግል ውጪ የሚደረግ ማንኛውንም የትጥቅ ትግል ተቀባይነት እንደሌለውም ገልፀዋል።

You might also like
Comments
Loading...