Fana: At a Speed of Life!

የሃውቲ አማፂያን በሰው አልባ አውሮፕላን ባደረሱት ጥቃት የመንግስት ወታደሮች ተገደሉ

አዲስ አበባ፣ ጥር 2፣ 2011 (ኤፍ.ቢ.ሲ) የሃውቲ አማፂያን በሰው አልባ አውሮፕላን ባደረሱት ጥቃት የየመን መንግስት ወታደሮች መገደላቸው ተሰማ፡፡

በጥቃቱ ስድስት በሳዑዲ መራሹ የሚደገፉት የየመን ወታደሮች የተገደሉ ሲሆን፥ 12 ሰዎች መቁሰላቸውም ተነግሯል፡፡

ጥቃቱ የተፈፀመውም በየመን ደቡባዊ ግዛት ላህጅ በተባለው ቦታ በሚገኘው አል አናድ የጦር ሰፈር ውስጥ የመንግስት ወታደሮች የወታደራዊ ሰልፍ ትርኢት እያሳዩ በነበረበት ወቅት ነው ተብሏል፡፡

በጥቃቱ ወታደራዊ ሰልፉን እየተመለከቱ ከነበሩት መካከል የየመን መከላከያ ሰራዊት ምክትል ስራ አስኪያጅ የሆኑት ጀኔራል ሳለህ አል ዚንዳኒና የላህጅ ገዥ አል ቱርኪ በጥቃቱ ጉዳት እንደደረሳባቸው ነው የተገለጸው፡፡

ጥቃቱ በሳዑዲ ጥምር ጦር አባላት ላይ ያነጣጠረ መሆኑ ባለቤትነቱ የሀውቲ ቴሌቪዥን መዘገቡ ተገልጿል፡፡

ቀደም ሲል ሁለቱ ተፋላሚዎች በተባበሩት መንግስታት ድርጅት አማካኝነት የሰብዓዊ እርዳታ ለማድረስ ስታራቴጅክ በሆነችው ሁዳይዳህ ከተማ የተኩስ አቁም ስምምነት ማድረጋቸው ይታወሳል፡፡

በመሆኑም ይህ ጥቃት የተኩስ አቁም ስምምነቱ ላይ እክል እንዳይፈጥር ተሰግቷል፡፡

ምንጭ፦አልጀዚራ

You might also like
Comments
Loading...