Fana: At a Speed of Life!

የአሜሪካ የፌደራል ተቋማት ለ22 ቀናት በከፊል ዝግ በመሆን በሀገሪቱ ታሪክ ክብረወሰን ያዙ

አዲስ አበባ፣ ጥር 4፣ 2011 (ኤፍ.ቢ.ሲ) በአሜሪካ በከፊል የተዘጉ የፌደራል ተቋማት ለ22 ቀናት ያህል ዝግ በመሆን በሀገሪቱ ታሪክ ክብረወሰን መያዛቸው እየተነገረ ይገኛል፡፡

በሀገሪቱ የሚገኙ 800 ሺህ የፌደራል መስሪያ ቤቶች ውስጥ ለሚሰሩ ሰራተኞች አርብ መፈጸም የነበረበት ክፍያ አልተከፈላቸውም ተብሏል፡፡

ይህንንም ተከትሎ ሴኔቱና የህዝብ ተወካዮቹ በጋራ ተቋማቱ ክፍት በሚሆኑበት ወቅት ክፍያ እንዲፈጸምላቸው ድምጽ ሰጥተዋል፡፡

በሀገሪቱ የሚገኙ የተለያዩ የግል ተቋማትም ክፍያ ላልተፈጸመላቸው ሰራተኞች በነጻ እንዲገለገሉ ድጋፍ እያደረጉ ስለመሆኑም እየተነገረ ይገኛል፡፡

ከሳምንት በፊት ዴሞክራቶች የሚበዙበት የአሜሪካ የህዝብ ተወካዮች ምክር ቤት በከፊል ዝግ ሆነው የቆዩ የመንግስት መስሪያ ቤቶች እንዲከፈቱ ድምጽ ሰጥተዋል፡፡

ከሁለት ቀናት በፊት ደግሞ ዶናልድ ትራምፕ በከፊል በተዘጉ የመንግስት ተቋማት ዙሪያ ከዴሞክራቲክ መሪዎች ጋር ሲያደርጉ የነበረውን ስብሰባ ረግጠው ወጥተዋል፡፡

ስብሰባውን ረግጠው የወጡት የዴሞክራቶቹ ናንሲ ፔሎሲ እና ቻክ ስኩመር ፕሬዚዳንቱ በአሜሪካ እና ሜክሲኮ ድንበር ላይ ለመገንባት ላሰቡት የግንብ አጥር የጠየቁትን ፈንድ በመቃወማቸው ነበር።

ይህንንም ተከትሎ ዶናልድ ትራምፕ ለሜክሲኮ አሜሪካ አጥር ግንብ የጠየቁት 5 ቢሊየን ዶላር ኮንግረንሱ እንዲያጸድቅላቸው ብሄራዊ የአስቸኳይ ጊዜ አዋጅ ሊያውጁ ይችላሉ እየተባለ ይገኛል፡፡

በአሜሪካ ታሪክ ከዚህ ቀደም ለ21 ቀናት ያህል የመንግስት መስሪያ ቤቶች ዝግ ሆነው የቆዩት በፕሬዚዳንት ቢል ክሊንተን ዘመን በአውሮፓውያኑ 1995/96 እንደነበር ይታወሳል፡፡

ምንጭ፦አልጀዚራና ቢቢሲ

You might also like
Comments
Loading...