Fana: At a Speed of Life!

የነዳጅ ዋጋ መጨመርን ተከትሎ የትራንስፖርት ታሪፍ ማስተካከያ እንደማይኖር የፌደራል ትራንስፖርት ባለስልጣን ገለፀ

አዲስ አበባ፣ ጥር 23፣ 2011 (ኤፍ.ቢ.ሲ) ዛሬ በስራ ላይ የሚውለውን የነዳጅ ዋጋ መጨመር ተከትሎ ምንም አይነት የትራንስፖርት ታሪፍ  ጭማሪ እንደማይኖር የፌደራል ትራንስፖርት ባለስልጣን ገለፀ።

የአዲስ አበባም ሆነ የክልሎች የትራንስፖርት ታሪፍ ባለበት እንደሚቀጥልም ባለስልጣኑ አስታውቋል።

በባለስልጣኑ የፖሊሲ ጥናትና የእቅድ ዝግጅት ክትትልና ግምገማ ዳይሬክተር አቶ ፍስሃ መብራቱ እንደገለፁት፥ ከዛሬ ጀምሮ ተግባራዊ የሚሆነውን የነዳጅ ዋጋ ማሻሻያ ተከትሎ ምንም አይነት የትራንስፖርት ታሪፍ ጭማሪ አልተደረገም።

በህዳር ወር የነዳጅ ማስተካከያ በተደረገበት ወቅት የአገር አቋራጭ ትራንስፖርት ታሪፍ ላይ ማስተካከያ ስለተደረገና የአዲስ አበባውም የዛሬ አመት አካባቢ መሰረታዊ ማስተካከያ ያደረገ ስለሆነ የሚኖር ማስተካከያ አለመኖሩን ነው ያስታወቁት።

የትራንስፖርት አገልግሎት ሰጪ አካላት ይህንን አውቀው ምንም አይነት ጭማሪ ማድረግ እንደሌለባቸው ባለስልጣኑ ማሳሰቢያ ሰጥቷል።

ህብተረተሰቡ በቀድሞው ታሪፍ መሰረት የአገልግሎት ክፍያውን እንዲፈፅም አሳውቀዋል።

የንግድ ሚኒስቴር ከዛሬ ጀምሮ ተግባራዊ የሚደረግ የነዳጅ ምርቶች መሸጫ ዋጋ ላይ ማስተካከያ ማድረጉ ይታወቃል።

ምንጭ፦ ኢዜአ

You might also like
Comments
Loading...