Fana: At a Speed of Life!

የሃገር ሽማግሌዎች እና የሃይማኖት መሪዎች ለዘላቂ ሰላምና ሃገር ግንባታ ሚናቸውን እንዲወጡ ተጠየቀ

አዲስ አበባ ፣ ጥር 6 ፣ 2011 (ኤፍ ቢ ሲ) የሃገር ሽማግሌዎች እና የሃይማኖት መሪዎች ወቅታዊ ችግሮችን ከማርገብ ባለፈ ለዘላቂ ሰላምና ሃገር ግንባታ ሚናቸውን ከወትሮው በላቀ እንዲወጡ ተጠየቀ።

ከመላው ሃገሪቱ የተውጣጡ የሃገር ሽማግሌዎች እና የሃይማኖት መሪዎች የተሳተፉበት ሃገር አቀፍ የሰላም ኮንፈረንስ እየተካሄደ ነው።

በኮንፈረንሱ ላይ ለወጣቱ ትውልድ ሃገራዊ እሴቶችን በማውረስ ዘመናዊነትን በጥበብ እና በብልሃት እንዲላበስ፥ የሃገር ሽማግሌዎች ሚናቸውን ሊወጡ እንደሚገባ የሰላም ሚኒስትሯ ወይዘሮ ሙፈርያት ካሚል አሳስበዋል።

ሚኒስትሯ የሃገር ሽማግሌዎች ሰላምን ከማስፈንና ከማረጋገጥ አንጻር እስካሁን ላከናወኑት ተግባር ምስጋናቸውን አቅርበዋል።

የሃገር ሽማግሌዎች የሰላም ተንከባካቢ ቢሆኑም በሃገር ሽማግሌዎች ስም የሚነግዱና ሰላም ከሚያውኩ አካላት ጋር የሚሰሩ በመኖራቸው ከዚህ ድርጊታቸው ሊታቀቡ ይገባልም ብለዋል።

ሰላም ሰፍኖ መግባባትና መደማመጥ እንዲኖርም በሃገራዊ ጉዳዮች ላይ አንድነት መፍጠር እንደሚያስፈልግም አንስተዋል።

የሃገር ሽምግሌዎችም ጊዜያዊ ችግር ከመፍታት ባለፈ ዘላቂ ሰላምን ለማስፈን የሚያደርጉትን ጥረት ሊያጠናክሩ ይገባልም ነው ያሉት።

ከዚህ ባለፈም በአካባቢያቸው ማህበረሰቡን በማወያየትና የሰላም መድረኮችን በመፍጠር ከመንግስት ጎን እንዲቆሙም ጥሪያቸውን አቅርበዋል።

መንግስት በሃገሪቱ የሚስተዋሉ ችግሮችን ለማስቆም የህግ የበላይነትን የማስፈን ስራውን አጠናክሮ እንደሚቀጥልም ተናግረዋል።

የሃገር ሽማግሌዎች ለሃገር ሰላም በሚል መሪ ቃል እየተካሄደ ባለው መድረክ ላይ፥ የሃገር ሽማግሌዎች ሚና እና ግጭት አነሳሽ ምክንያቶችን በተመለከተ ጥናታዊ ጽሁፎች ቀርበው ውይይት ተደርጎባቸዋል።

በዚህም ብሄርና ጎሳ ላይ የተመሰረተ ግጭት አሁን ላይ እንደሚስተዋልና ይህ ጉዳይ አስቸኳይ መፍትሄ ካልተሰጠው አስቸጋሪ ሁኔታ ሊያስከትል እንደሚችል ተገልጿል።

መልካም አስተዳደርን ማስፈን፣ ዜግነትን ማጠናከር፣ የዜጎችን እኩል ተጠቃሚነት ማረጋገጥና የማህበረሰቡን ንቃተ ህሊና ማሳደግ መፍትሄ ሆኖም ተጠቅሷል።

 

 

በፋሲካው ታደሰ

 

 

You might also like
Comments
Loading...