Fana: At a Speed of Life!

ከመኸር እርሻ 314 ሚሊየን ኩንታል ምርት እንደሚገኝ ይጠበቃል

አዲስ አበባ፣ ጥር 3፣ 2011 (ኤፍ ቢ ሲ) ኢትዮጵያ በመኸር ወቅት 314 ሚሊየን ኩንታል ምርት ታገኛለች ተብሎ እንደሚጠበቅ የማዕከላዊ ስታቲስቲክስ ኤጀንሲ አስታወቀ ።

ኤጀንሲው በ2010/2011 የምርት ዘመን የዋና መኸር የሰብል ምርት ትንበያን አስመልክቶ ለመገናኛ ብዙሃን መግለጫ ሰጥቷል።

40 ሺህ የግብርና ቤተሰቦችን በናሙና መርጦ እስከ የካቲት 10 ቀን ድረስ ያለውን የመኸር ምርት ትንበያ በማድረግ ሳይንሳዊ ግምት ማስቀመጡን የኤጀንሲው ምክትል ዋና ዳይሬክተር አቶ አማረ ለገሰ ተናግረዋል።

የእርሻ ማሳዎችን ከመለካት ባለፈ ከተለያዩ አካባቢዎች አርሶ አደሮችና የግብርና ባለሙያዎች መረጃ መሰብሰቡንም ዳይሬክተሩ ጠቁመዋል።

ለትንበያው የምርት ዘመኑን የአየር ንብረት፣ የማዳበሪያ፣ የምርጥ ዘርና የፀረ ሰብል ተባይ መድሃኒት አጠቃቀምን ከግምት ውስጥ ያስገባ ጥናት ማካሄዳቸውንም ገልፀዋል።

በዚህም በመኸሩ ወቅት ከታረሰው 12 ሚሊየን ሄክታር ማሳ 314 ሚሊየን ኩንታል ምርት ይገኛል ተብሎ እንደሚጠበቅ ነው የተናገሩት።

ይህም ከአምናው ተመሳሳይ ወቅት የምርት መጠን ጋር ሲነፃፀር የ 8 ነጥብ 5 ሚሊየን ኩንታል ምርት ልዩነት እንደሚኖረው ምክትል ዋና ዳይሬክተሩ አስታውቀዋል።

የግብርና ሚኒስቴር በበኩሉ ኤጀንሲዉ ይፋ ያደረገዉ ትንበያ ሚኒስቴር መስሪያ ቤቱ አጠቃላይ በ2010/11 የመኸር እርሻ፣ የበልግና የመስኖ ልማትን ጨምሮ 375 ሚሊየን ኩንታልን ለማግኘት እቅድ አስቀምጧል።

በግብርና ሚኒስትር የእርሻ ልማት ሚስትር ዴኤታዉ አቶ ሳኒ ረዲ የብሄራዊ ስታስቲክ ኤጀንሲ ትንበያ የግብርና ሚኒስቴር ለማግኘት ካቀደዉ የመኸር ምርት እስከ 83 በመቶውን የሚሸፍን እንደሆነ ለፋና ብሮድካስቲንግ ኮርፖሬት ገልፀዋል።

በተለይም ደግሞ ይህ ቅድመ መኸር ትንበያ ጥናት ያላካተታቸዉን ምርቶችን አካቶ ሚኒስቴር መስሪያ ቤቱ እቅዱን ለማሳካት እየሰራ መሆኑንም አቶ ሳኒ ተናግረዋል።

በአሁኑ ወቅት በመኸር ሰብሉ ከተሸፈነዉ ማሳ በመላ ሀገሪቱ አጠቃላይ 90 ከመቶ የሚሆነዉ የደረሰ ሰብል በሰዉ ሀይልና በተለያዩ ዘመናዊ መሳሪያዎች በመታገዝ መሰብሰብ መቻሉን ከሚኒስቴር መረጃ ያመለክታል።

በሶዶ ለማና በሙሀመድ አሊ

 

You might also like
Comments
Loading...