Fana: At a Speed of Life!

አይፎን ስልክ ለመግዛት ኩላሊቱን የሸጠው ቻይናዊ የእድሜ ልክ አካል ጉዳተኛ ሆኗል

አዲስ አበባ፣ ጥር 1፣ 2011 (ኤፍ.ቢ.ሲ) ዠያዎ ዋንግ የተባለው ቻይናዊ እድሜው የ17 ዓመት ታዳጊ ወጣት እያለ ነበር አይፎን 4 የተባለውን ስማርት ስልክ ለመግዛት አንድ ኩላሊቱን ለመሸጥ የወሰነው።

በወቅቱም ከደሃ ቤተሰብ የተወለደው እና ስልኩን ለመግዛት በቂ ገንዘብ የሌለው ዋንግ አንድ ኩላሊቱን ቢሸጥም በሌላኛው መደበኛ ህይወቱን መቀጠል አንደሚችል ተነግሮት ነበር ዠያዎ ዋንግ ኩላሊቱን የሸጠው።

ሆኖም ግን ይህ ውሳኔው እንዳሰበው ደስታን ሳይሆን መጥፎ እድልን ነው ይዞለት የመጣው።

በወቅቱ የ17 ዓመት ታዳጊ ወጣት የነበረው ዋንግ አሁን ላይ የ24 ዓመት ወጣት ነው፤ ዋንግ ኩላሊቱን ከሸጠ በኋላ በአንድ ኩላሊቱ መደበኛ ኑሮም መምራት እጀምራለሁ ብሎ ቢያስብም የሆነው ግን ከዚህ በተቃራኒ ነው።

ዋንግ ላለፉት 8 ዓመታት የአልጋ ቁራኛ ለመሆን የተገደደ ሲሆን፥ የኩላሊት እጥበት (ዲያላሲስ) ለማድረግ መገደዱም ነው የተነገረው።

ዋንግን ለዚህ የዳረገው ደግሞ ህገ ወጥ በሆነ መልኩ እና ንፅህናው ባልተጠበቀ መሳሪያ በተደረገለት ቀዶ ጥገና ኩላሊቱን በማስወጣቱ ነው ተብሏል።

ይህም ዋንግ ለኢንፌክሽን እንዲጋለጥ ያደረገ ሲሆን፥ ይህ ኢንፌክሽንም ቀሪ አንድ ኩላሊቱን ከጥቅም ውጭ በማድረጉ ነው ዋንግ የአልጋ ቁራኛ ለመሆን የተገደደው።

ጉዳዩን ዘግይተው የሰሙት የዋንግ ቤተሰቦችም ይህንን ድርጊት የፈፀመውን ዶክተር እና ኩላሊቱን የገዛውን ግለሰብ ተከታትለው በማስያዝ ለዋንግ 2 ነጥብ 2 ሚሊየን የቻይና ዩዋን ወይም 320 ሺህ የአሜሪካ ዶላር ካሳ እንዲከፈለው አድርገዋል።

ዋንግ ከግለሰቦቹ ያገኘው የካሳ ክፍያ ገንዘብም የህክምና ወጪውን ለመሸፈን እየዋለ መሆኑም ነው የተነገረው።

ምንጭ፦ www.odditycentral.com

You might also like
Comments
Loading...