Fana: At a Speed of Life!

ቼልሲ ክርስቲያን ፑልሲችን ከቦሩሲያ ዶርትመንድ አስፈረመ

አዲስ አበባ ፣ ታህሳስ 24 ፣ 2011 (ኤፍ ቢ ሲ) የምዕራብ ለንደኑ ክለብ ቼልሲ አሜሪካዊውን የፊት መስመር ተጫዋች ክርስቲያን ፑልሲችን ከቦሩሲያ ዶርትመንድ አስፈርሟል።

ክለቡ ለፑልሲች ዝውውር 58 ሚሊየን ፓውንድ የከፈለ ሲሆን፥ እስከ ውድድር አመቱ መጨረሻ ድረስ በጀርመን እንዲቆይ ተስማምቷል።

የዶርትመንድ ዳይሬክተር ሚሼል ዞርች ፑልሲች በእንግሊዝ ፕሪሚየር ሊግ የመጫወት ፍላጎት እንዳለው ገልጸዋል።

የ20 አመቱ ተጫዋች አርሰናልን አልያም ሊቨርፑልን ይቀላቀላል የሚሉ ጭምጭምታዎች ቢኖሩም ማረፊያውን ስታምፎርድ ብሪጅ አድርጓል።

ለሃገሩ አሜሪካ ባደረጋቸው 23 ጨዋታዎች 9 ጎሎችን ያስቆጠረ ሲሆን፥ በጀርመኑ ክለብም ጥሩ የሚባል ጊዜን እያሳለፈ ይገኛል።

ፑልሲች በዶርትመንድ ያለው ኮንትራት በፈረንጆቹ 2020 የሚጠናቀቅ ነበር።

በሌላ በኩል የጣሊያኑ ኢንተር ሚላን ለማንቼስተር ዩናይትዱ የመስመር ተከላካይ አሽሊ ያንግ የዝውውር ጥያቄ አቅርቦለታል።

ኢንተር ተጫዋቹን የሁለት አመት ኮንትራት እናስፈርምህ የሚል ጣያቄን ያቀረበ ሲሆን፥ ማንቼስተር ደግሞ የአንድ አመት ተጨማሪ ኮንትራት አቅርቦለታል።

የፈረንሳዩ ሞናኮ ደግሞ የቼልሲውን አማካይ ሴስክ ፋብሪጋስን ይፈልገዋል ተብሏል።

የክለቡ አሰልጣኝ ቲዬሪ ሄንሪ የቀድሞ የክለብ አጋሩን በማምጣት ክለቡን ማጠናከር ይፈልጋል ነው የተባለው።

የሊቨርፑሉ አሰልጣኝ የርገን ክሎፕ ደግሞ የብራይተኑን አማካይ ፓስካል ግሮስን ለማዘዋወር ማቀዳቸው ተሰምቷል።

አሰልጣኙ በዋንጫ ፉክክር ውስጥ ያለውን ክለብ ቀጣይ ጉዞ የተሳካ ለማድረግ የቡድኑን ስብስብ የማስፋት እቅድ ይዘዋል።

ለዚህም የ27 አመቱን አማካይ የዝውውር ኢላማቸው ማድረጋቸው ተነግሯል።

 

መረጃው የቢቢሲ፣ ደይሊ ሚረር እና ሜይል ነው

You might also like
Comments
Loading...