Fana: At a Speed of Life!

ታይዋን አዲስ ወታደራዊ ልምምድ ጀመረች

አዲስ አበባ ፣ ጥር 1 ፣ 2011 (ኤፍ ቢ ሲ) ታይዋን አዲስ ወታደራዊ ልምምድ ጀመረች።

የታይዋን ጦር በአይነቱ ለየት ያለና ከፍተኛ የተባለ ወታደራዊ ልምምድ መጀመሩን አስታውቋል።

ጦሩ ዘወትር ልምምድ ላይ ቢሆንም ዛሬ ተጀመረ የተባለው ወታደራዊ ልምምድ ግን፥ ከቻይና ሊገጥማት የሚችልን ማንኛውም ወረራና የሃይል እርምጃ ለመመከት ያለመ መሆኑ ተገልጿል።

የታይዋን ዜና አገልግሎት መከላከያ ሚኒስትሩን ሜጀር ጀኔራል ዬህ ኩዎ ሁይን ጠቅሶ እንደዘገበው፥ ልምምዱ በውህደት ሰበብ ከቻይና ሊቃጣ የሚችልን ወረራና ጥቃት ለመመከት ያለመ ነው።

ባለፈው ሳምንት የቻይና ፕሬዚዳንት ሺ ጂንፒንግ ታይዋን የቻይና አካል መሆኗን ማንም አይቀይረውም ሲሉ ተደምጠው ነበር።

ፕሬዚዳንቱ በወቅቱ ባደረጉት ንግግር ታይዋን ከቻይና ጋር ለሚደረግ ውህደት መዘጋጀትና ያንን መቀበል እንዳለበት ማንሳታቸውም ይታወሳል።

ከዚህ ባለፈም ቻይና በታይዋን ጉዳይ የሚኖር ጣልቃ ገብነትን እንደማትታገስና፥ ውህደቱን እውን ለማድረግም ወታደራዊ ሃይል እስከ መጠቀም እንደምትደርስ ገልጸዋል።

የታይዋን ፕሬዚዳንት ጻይ ኢንግ ዎን በበኩላቸው፥ ቻይና የታይዋንን ሉዓላዊነት አምና መቀበል አለባት የሚል ምላሽ ሰጥተዋል።

ታይዋን በፈረንጆቹ 1949 በተደረገ የርስ በርስ ጦርነት ከቻይና ተገንጥላ፥ ሉዓላዊ ሃገር ነኝ ብላ አውጃለች።

ቻይና በበኩሏ ታይዋን አንድ የግዛቴ አካል እንጅ ሉዓላዊ ሃገር አይደለችም በሚል ለታይዋን የሃገርነት እወጃ እውቅናን ትነፍጋለች።

 

 

 

ምንጭ፦ አልጀዚራ

 

You might also like
Comments
Loading...