Fana: At a Speed of Life!

ቤተሰቦቻቸውን ከችግር ለመታደግ ፆታቸውን ወንድ ያስመሰሉት ልጃገረዶች

 

አዲስ አበባ፣ጥር 17፣ 2011 (ኤፍ ቢ ሲ) በህንድ ሁለት እህትማማች ልጃገረዶች ቤተሰቦቻቸውን ከችግር ለመታደግ ለአራት ዓመታት ያህል ፆታቸውን ወንድ ማስመሰላቸው ተነግሯል።

ሁለት በአስራዎቹ እድሜ ክልል ላይ የሚገኙ እህትማማቾች የአባታቸውን ስራ በማስቀጠል ቤተሰቦቻቸውን ከችግር ለመታደግ ሲሉ ለአራት አመታት ያክል ወንድ ለመምሰል ተገደዋል።

ማንኛውም ሰው በምድር ላይ ሲኖር ለተለያዩ ችግሮች መጋለጡ የማይቀር ነው።

ጠንካራ ሰዎች እነዚህን ችግሮች ለማስወገድ የተለያዩ ዘዴዎችን ይጠቀማሉ፤ አንዳንዶቹ ደግሞ ችግሮችን ሳይጋፈጡ በመቅረታቸው ህይዎታቸውን አላስፈላጊ በሆነ መልኩ ሲመሩ ይስተዋላሉ።

በህንድ ኡታራ ፕራዲሽ ግዛት ሁለት እህትማማቾችም ቤተሰባቸው ያጋጠመውን ችግር ለመጋፈጥ የወሰኑት ውሳኔ አነጋጋሪ ሆኗል።

ልጃገረዶቹ በፀጉር ቤት ስራ ቤተሰቡን ሲያስተዳድር የነበረው አባታቸው በድንገት ታሞ አልጋ ላይ ይውላል።

በዚህም የቤተሰቡ ገቢ በአባወራው የጸጉር ስራ የሚገኝ ነበርና ቤት ውስጥ የሚላስ የሚቀመስ ይጠፋል።

ስለሆነም ሁለቱ እህትማማቶቹ የተዘጋውን ፀጉር ቤት ከፍተው ለመስራት ወሰኑ።

ይሁን እንጅ ወንድ ደንበኞች በሚስተካከሉበት ሰዓት በብቃታቸው አለመተማመንና በመሰል ችግሮች ምከንያት ጥሩ ገቢ ማግኘት አልቻሉም።

በመቀጠልም ይህን ችግር ለማስወገድ የሚረዳ መፍትሄ ፈለጉ፤ ችግሩን ለማስወገድም ፆታቸውን ወንድ ማስመሰል እንደሚገባቸው ራሳቸውን አሳመኑ።

በዚህም መሰረት ልጃገረዶቹ ወንድ ለመምሰል ፀጉራቸውን ከመስተካከልና ድምፃቸውን ከመቀየር ጀምሮ ሌሎች ወንድ የሚያስመስሉ አልባሳትን ለበሱ።

ወንድ መስለው ስራ ሲጀምሩም የደንበኞቹ ቁጥር በሚገርም ፍጥነት ጨምሮ በቀን እስከ 400 የህንድ ሩፒ መሰብሰብ ችለዋል።

በዚህ መልኩም ከቅርብ ጎረቤቶቻቸው በስተቀር ማንም ደንበኛ ሳያውቅባቸው ለአራት ዓመታት ትምህርታቸውን ከመቀጠል ባለፈ ቤተሰቦቻቸውን በጥሩ ሁኔታ ማስተዳደር መቻላቸው ተነግሯል።

የልጃገረዶቹ ታሪክ በአካባቢው በሚገኝ አንድ ጋዜጠኛ አማካይነት ሂንዲ ጋዜጣ ላይ መውጣቱን ተከትሎም በሀገር አቀፍ ደረጃ ተሸላሚ መሆናቸውንና በአካባቢው ባለስልጣናት ዘንድም ከፍተኛ አድናቆት ማግኘታቸው በዘገባው ተመላክቷል።

 

ምንጭ ፦odditycentral.com

 

You might also like
Comments
Loading...