Fana: At a Speed of Life!

በገንዳውኃ የደረሰውን ጉዳት የሚያጣራ ቡድን ወደ አካባቢ በአስቸኳይ ይላካል- አቶ ገዱ አንዳርጋቸው

አዲስ አበባ፣ ጥር 2፣ 2011 (ኤፍ.ቢ.ሲ) በገንዳውኃ የደረሰውን ጉዳት ከፌዴራል ከሚመለከታቸው አካላት ጋር በመሆን የሚያጣራ ቡድን ወደ አካባቢው በአስቸኳይ እንደሚላክ የአማራ ክልል ርዕሰ መስተዳድር አቶ ገዱ አንዳርጋቸው አስታወቁ፡፡

ርዕሰ መስተዳድሩ በምዕራብ ጎንደር ዞን የተከሰተውን ችግር አስመልክቶ በዛሬው ዕለት መግለጫ ሰጥተዋል፡፡

አንድ የኮንስትራክሽን ድርጅት መኪኖቹን ከአንደኛው ፕሮጀክት ወደ ሌላኛው ፕሮጀክት ለማንቀሳቀስ በሞከረበት ወቅት በተፈጠረ አለመግባባት አሳዛኝ ክስተት ተፈጥሯል ብለዋል፡፡

በመግለጫቸው የተቋራጩን ተሽከርካሪዎች አጅቦ ይሄድ የነበረው የኢፌዴሪ መከላከያ ሠራዊት እንደነበር የገለፁት ሲሆን፥ ከአካባቢው የፀጥታ ሁኔታ አንጻር ታጅቦ መንቀሳቀሱ ተገቢ እንደነበርና የተፈጠረው ሁኔታ ግን መሆን ያልነበረበት እንደሆነ አንስተዋል፡፡

ችግሩ ቢያጋጥም እንኳ በትዕግስትና በውይይት ጉዳዩን ለመፍታት ጥረት መደረግ እንደነበረበት ተናግረዋል፡፡

በተፈጠረው ግጭት አሳዛኝ በሆነ መልኩ ንጹሃን ዜጎች ጭምር ሕይወታቸው አልፏል ብለዋል፡፡

እንደ ርዕሰ መስተዳድሩ ገለፃ በግጭቱ ውስጥ ምንም ሚና ያልነበራቸው ዜጎች ጉዳት እንደደረሰባቸው ተናግረዋል፡፡

በመሆኑም የጉዳቱ ዝርዝሩ ተጣርቶ ያልተገባና ተመጣጣኝ ያልሆነ እምጃ የወሰዱ አካላት በሕግ ተጠያቂ የሚሆኑበት ሁኔታ እንደሚኖርም ገልፀዋል፡፡

በተጨማሪም በምዕራብ ጎንደር አካባቢ የእርስ በእርስ መገዳደል እየቀጠለ መሆኑን ርዕሰ መስተዳድሩ በመግለጫቸው አንስተዋል፡፡

“የእርስ በእርስ መገዳደሉ ዓላማ ቢስ፣ መዳረሻ የሌለው፣ ንጹሃንን ከመግደልና ከመጉዳት ባለፈ ምንም ዓይነት ጥቅም የሌለው ፀረ-ሰላም እንቅስቃሴ ስለሆነና ንጹሃኑን የአማራና የቅማንት ሕዝብ ለአደጋ ያጋለጠ አደገኛ አካሄድ ስለሆነ በአስቸኳይ መቆም አለበት” ብለዋል፡፡

የክልሉ መንግሥት በምዕራብ ጎንደር አካባቢ ሰላም የማስከበር ኃላፊነቱን ለመወጣት ሕጋዊና ጠንካራ እርምጃ ለመውሰድ የሚንቀሳቀስ መሆኑንም ርዕሰ መስተዳድሩ አስታውቀዋል፡፡

“ከሁለቱም ወገን ታጥቀው ሰላማዊ የሆነውን ሕዝብ ለከፍተኛ ጉዳት እየዳረጉ ያሉ ወገኖች በአስቸኳይ ከዚህ ድርጊታቸው እንዲታረሙና አጥፊዎች ለሕግ እንዲቀርቡ ሕዝቡ ከመንግሥት ጎን እንዲቆም ጥሪዬን አስተላልፋለሁ” ነው ያሉት ርዕሰ መስተዳድሩ፡፡

አጋጣሚውን በመጠቀም የክልሉ ሰላም እንዲናጋ፣ የሕዝቡንና የመንግሥትን የዕለት ተዕለት እንቅስቃሴ በማስተጓጎል የልማትና የሰላም እንቅስቃሴዎች እንዲደናቀፉ የሚደረግን ጥረት ለመቆጣጠር የክልሉ መንግሥት ሰፊ ሥራ እንደሚሠራም አስታውቀው፥ሕዝቡም በአንድነት ከመንግሥት ጎን እንዲቆም ጥሪ አቅርበዋል፡፡

ምንጭ-አብመድ

You might also like
Comments
Loading...