Fana: At a Speed of Life!

የሰራተኛና ማህበራዊ ጉዳይ ሚኒስትር ዶክተር ኤርጎጌ ተስፋየ ከሳዑዲ አቻቸው ጋር ተወያዩ

አዲስ አበባ ፣ታህሳስ 29፣2011 (ኤፍ ቢ ሲ) የሰራተኛና ማህበራዊ ሚኒስትር ዶክተር ኤርጎጌ ተስፋየ ከሳዑዲ አቻቸው ኢንጂነር አህመድ ቢን ሱሌይማን አል ራጂህ ጋር በትናንትናው ዕለት በሪያድ ተወያይተዋል።

ሚኒስትሮቹ በውይይታቸው ሀገራቱ በሚኖራቸው የጋራ ጉዳዮች ላይ በትብብር ለመስራት በሚቻልበት ሁኔታ ላይ መምከራቸውን ከሳዑዲ ዓረቢያ መገናኛ ብዙሃን ድርጅት ያገኘነው መረጃ ያመላክታል።

ሚኒስትር አል ራጂህ ሀገራቸው ከኢትዮጵያ የምትወስዳቸውን ሰራተኞች የምትቀጥርበትን ሁኔታና የምልመላ መስፈርት በተመለከተ ለኢትዮጵያ አቻቸው ገለፃ አድርገዋል።

በተጨማሪም በሀገሪቱ የሚሰሩ ኢትዮጵያዊ ሠራተኞች መነሻ የደመወዝ ወለል መጠን 1 ሺህ የሳዑዲ ሪያል እንዲሆንና የሠራተኛውና የአሰሪው መብት በሚጠበቅበት ሁኔታ መግባባት ላይ ተደርሷል።

በሁለቱ አገራት መካከል የተፈረመው የሠራተኛ ስምምነት ውል በሚተገበርበት ሁኔታና ብሎም የሠራተኛ ልውውጥ ስምምነት ተግባራዊ ለማድረግ ከሁለቱ አገራት የተውጣጣ የባለሙያዎች ቡድን በየስድስት ወሩ እየተገናኘ አፈጻጸሙን የሚገመግም መሆኑም ተገልጿል።

ሳዑዲ አረቢያ በሀገር ውስጥ ያለውን የስራ ዕድል ግምት ውስጥ በማስገባት ከተለያዩ ሀገሮች የሚመጡ ብቁ እና ልምድ ያላቸውን ባለሙያዎችን በተገቢው ሁኔታ የስራ ዕድል ለመፍጠር ቁርጠኛ አቋም ያላት መሆኑንም ሚኒስትሩ ተናግረዋል።

 

You might also like
Comments
Loading...