Fana: At a Speed of Life!

ለህዳሴ ግድብ ተርባይን ጀኔሬተር ግንባታ በ77 ሚሊየን ዶላር ስምምነት ተፈጸመ

አዲስ አበባ፣ ጥር 3፣ 2011 (ኤፍ.ቢ.ሲ) የኢትዮጵያ ኤሌክትሪክ ኃይል ለታላቁ የኢትዮጵያ ህዳሴ ግድብ ተርባይን ጀኔሬተር ግንባታ በ77 ነጥብ 9 ሚሊየን የአሜሪካ ዶላር ቮይት ሀይድሮ ሻንጋይ ከተባለ ኩባንያ ጋር የኮንትራት ሥምምነት ተፈራረመ።

የኮንትራት ስምምነቱ በትናንትናው ዕለት ሲካሄድ፥ የስድስት ተርባይን ጀኔሬተር ዩኒቶች የተጓደሉ እቃዎችን ለማቅረብ፣ የተከላ፣ የፍተሻና ሙከራ /ኮሚሽኒንግ/ ስራዎችን ለማከናወን መሆኑ ተገልጿል።

ስምምነቱን የኢትዮጵያ ኤሌክትሪክ ኃይል ዋና ስራ አስፈፃሚ ዶክተር ኢንጅነር አብርሃም በላይ እና የቮይት ሀይድሮ ሻንጋይ ኩባንያ ምክትል ፕሬዚዳንት ታንግ ሹ ተፈራርመዋል።

ዶክተር አብርሃም የህዳሴ ግድብ ፕሮጀክት ግንባታን ወደ ቀድሞው ፍጥነት ለመመለስ የተለያዩ ተግባራት እየተከናወኑ መሆኑን ጠቅሰው፥ ስምምነቱ በፕሮጀክቱ ግንባታ ላይ የተፈጠረውን ክፍተት በማረም ግንባታውን ለማፋጠን ከፍተኛ ፋይዳ ይኖረዋል ብለዋል።

ታንግ ሹ በበኩላቸው በኢትዮጵያ በተለያዩ ፕሮጀክቶች ላይ አሻራውን ሲያሳርፍ የቆየ በመሆኑ በታላቁ ህዳሴ ግድብ ላይ ከተሳተፉ ሌሎች ኩባንያዎች ጋር በመቀናጀት በጥራትና በተያዘለት የጊዜ ገደብ መሰረት አጠናቀው ለማስረከብ ትኩረት ሰጥተው እንደሚሰሩ ገልፀዋል።

ቮይት ሀይድሮ ሻንጋይ መቀመጫውን ጀርመን ያደረገ የቻይና ኩባንያ ነው።

የታላቁ የኢትዮጵያ ህዳሴ ግድብ ፕሮጀክት ስራ አስኪያጅ ኢንጂነር ክፍሌ ሆሮ ቮይት ሀይድሮ ሻንጋይ ኩባንያ ከዚህ በፊት ከኢፌዴሪ ብረታ ብረት እና ኢንጂነሪንግ ኮርፖሬሽን ጋር ስምምነት በማድረግ የጄኔሬተር ተርባይን እቃ አቅርቦት ላይ ተሳትፎ እንደነበረው ጠቅሰዋል።

የብረታ ብረት እና ኢንጂነሪንግ ኮርፖሬሽን በፕሮጀክቱ ላይ ሲያከናውናቸው የነበሩ ስራዎች ወደ ኢትዮጵያ ኤሌክትሪክ ኃይል እንዲዛወሩ በተሰጠው አቅጣጫ መሰረት ውሉን በማሻሻል ስምምነት እንደተካሄደም ስራ አስኪያጁ ገልፀዋል።

ከኩባንያው ጋር የተደረሰው ስምምነት የ77 ነጥብ 9 ሚሊየን የአሜሪካ ዶላር እንደሆነም ኢንጂነር ክፍሌ አንስተዋል።

የኢትዮጵያ ኤሌክትሪክ ኃይል የፕሮጀክቱን ግንባታ ለማፋጠን ከሌሎች የተለያዩ ኩባንያዎች ጋር ከዚህ በፊት የኮንትራት ስምምነት መፈራረሙ የሚታወስ ነው።

 

 

You might also like
Comments
Loading...