Fana: At a Speed of Life!

ቻይናና ፖርቹጋል በተለያዩ ጉዳዮች ዙሪያ በጋራ ለመስራት ተስማሙ

አዲስ አበባ፣ህዳር 26፣2011 ኤፍ.ቢ.ሲ) ቻይና እና ፖርቹጋል በተለያዩ ጉዳዮች ዙሪያ በጋራ ለመስራት መስማማታቸው ተገለፀ።

የቻይናው ፕሬዚዳንት ሺ ጂን ፒንግ ለሁለት ቀን ይፋዊ የስራ ጉብኝት በትናንትናው ዕለት ፖርቹጋል ሊዝበን ገብተዋል።

ፕሬዚዳንቱ በፖርቹጋል በነበራቸው የመጀመሪያ ቀን ጉብኝትም ከሀገሪቱ ፕሬዚዳንት ማርሴሎ ዲ ሳኡሳ ጋር ተወያይተዋል።

በውይይታቸውም ሀገራቱ በተለያዩ ጉዳዮች ዙሪያ ላይ በጋራ ለመስራት በሚችሉበት ሁኔታ ላይ መምከራቸው ነው የተገለፀው ።

በዚህ መሰረትም ቻይና እና ፖርቹጋል ከዚህ በፊት የነበራቸውን የሁለትዮሽ ግንኙነት አጠናክረው የሚቀጥሉ መሆኑን ፕሬዚዳንት ሺ ጂን ፒንግ  ተናግረዋል።

ቻይና ፖርቹጋል በአሁኑ ወቅት የምታደርገውን የኢኮኖሚ እንቅስቃሴ ታደንቃለች ያሉት ሺ ጂን ፒንግ ፥ይህ ሁኔታ ተጠናክሮ ይቀጥል ዘንድም ቻይና የበኩሏል ድጋፍ የምታደርግ መሆኑን አንስተዋል።

ከኢኮኖሚያዊ ጉዳዮች ባለፈም ሀገራቱ በፖለቲካዊ፣ በማህበራዊና በተለያዩ የጋራ ጉዳዮች ላይ በትብብር የሚሰሩ መሆኑን በአፅንኦት ተናግረዋል።

ከዚህ ባለፈም የሁለቱ ሀገራት ህዝቦች የሚኖራቸውን ባህላዊና ቁሳዊ ትስስር ለማጎልበት የተለያዩ ስራዎች እየተሰሩ መሆኑን ፕሬዚዳንቱ ጠቁመዋል።

በዚህ መሰረትም ቻይና በሚቀጥለው ዓመት የሁለቱ ሃገራቱን ህዝቦች ትስስር ለማጠናከር ሲባል በፖርቹጋል ሊዝበን ከተማ የቻይና ባህል ማዕከል የምትከፍት መሆኑ ነው የተገለፀው።

በተጨማሪም ሀገራቱ ዲፕሎማሲያዊ ግኝኙነት የጀመሩበትን 40ኛ ዓመት በሚቀጥለው ዓመት በጋራ የሚያከበሩ መሆኑን በዘገባው ተመላክቷል።

የፓርቹጋሉ ፕሬዚዳንት ማርሴሎ ዲ ሳኡሳ በበኩላቸው፥ቻይና ከፖርቹጋል ጋር ጥብቅ የሆነ የሁለትዮሽ ግንኙነት ያላት መሆኑን እና ወደ ፊትም በተለያዩ ቀጠናዊና ዓለም አቀፋዊ ጉዳዮች ላይ በጋራ ለመስራት መስማማታቸውን ተናግረዋል።

ቻይና እና ፖርቹጋል በብዙ አለም አቀፋዊ ጉዳዮች ላይ ተመሳሳይ አቋም ያላቸው በመሆኑ ግንኙነት የተጠናከረና ዘላቂ እንደሚሆን ነው የገለፁት ።

 

ምንጭ ፦ሽንዋ

You might also like
Comments
Loading...