Fana: At a Speed of Life!

ፕሬዚዳንት ሳሕለወርቅ በኢትዮጵያ የተመድ የሴቶች ቢሮ ሃላፊ ሌቲ ቺዋራ ጋር ተወያዩ

አዲስ አበባ፣ህዳር 26፣2011 ኤፍ.ቢ.ሲ) የኢፌድሪ ፕሬዚዳንት ሳሕለወርቅ ዘውዴ  በዛሬው ዕለት በኢትዮጵያ የመንግስታቱ ድርጅት የሴቶች ቢሮ ሃላፊ ሌቲ ቺዋራን በፅህፈት ቤታቸው ተቀብለው አነጋግረዋል።

በውይይታቸውም ድርጅቱ በኢትዮጵያ በሚያደርጋቸው የስራ እንቅስቃሴዎች እና በተገኙ ውጤቶች  ዙሪያ ላይ መምከራቸው ነው የተገለፀው።

ድርጅቱ በዋናነት የሴቶችን አቅም ለመገንባት የሚያግዙ ፕሮጀክቶችን በመቅረፅ የተለያዩ ተግባራትን እያከናወነ መሆኑን በኢትዮጵያ የመንግስታቱ ድርጅት የሴቶች ቢሮ ሃላፊ ሌቲ ቺዋራ ተናግረዋል።

በዚህም  እንቅስቃሴም በሀገሪቱ መልካም የሚባሉ ውጤቶችን ማምጣት እንደተቻለ  የገለጹት ሃላፊዋ፥በኢትዮጰያ ድርጅቱ በ10 ሚሊየን ዶላር  የተለያዩ ፕሮጀክቶችን በመተግበር ላይ ይገኛል ብለዋል፡፡

ፕሬዚዳንት ሳሕለወርቅ ዘውዴ በበኩላቸው  የድርጅቱ ስራዎች የሚበረታቱ መሆናቸውን የገለጹ ሲሆን ፥ በቀጣይነትም መንግስት በዘርፉ ለመተግበር ከያዛቸው ፕሮግራሞች ጋር በማጣጣምና ውጤታማነታቸውንም በማሳደግ ለተሻለ ስራ እንዲንቀሳቀስ አሳስበዋል።

በተያያዘ ዜና ፕሬዚዳንቷ የእናት ባንከን የስራ አመራር ቦርድ አባላትን ተቀብለው ማነጋገራቸውን ከፕሬዚዳንት ፅህፈት ቤት ያገኘነው መረጃ ያመለክታል።

ባንኩ የሴቶችን የስራ ፈጣሪነት አቅም ለማሳደግና ብቁ ተወዳዳሪ የሚሆንበትን እድል ለመፍጠር የሚያከናውናቸውን ተግባራትም በተጠናከረ መንገድ እንዲቀጥል አስገንዝበዋል ፡፡

 

You might also like
Comments
Loading...