Fana: At a Speed of Life!

ፈረንሳይ በነዳጅ ላይ የጣለችውን ግብር ልታግድ ነው

አዲስ አበባ ፣ ህዳር 25 ፣ 2011 (ኤፍ ቢ ሲ) የፈረንሳይ መንግስት በነዳጅ ላይ ጥሎት የነበረውን ግብር ሊያግድ ነው።

መንግስት እዚህ ውሳኔ ላይ የደረሰው በሃገሪቱ በተለይም በመዲናዋ ፓሪስ የሚደረጉ የተቃውሞ ሰልፎች እየበረቱ መምጣታቸውን ተከትሎ ነው ተብሏል።

ፕሬዚዳንት ኢማኑኤል ማክሮን ሃገራቸው የአየር ንብረት ለውጥን ለመከላከል ትሰራለች በሚልና የአረንጓዴ ኢኮኖሚን ለማበረታታት ነዳጅ ላይ ግብር መጣላቸው ይታወሳል።

ይህ መሆኑ ደግሞ የኑሮ ውድነትን ያመጣል በሚል ከሃገሬው ዜጎች ከፍ ያለ ተቃውሞ ገጥሞታል፤ በመዲናዋ ፓሪስም ግጭት አዘል የተቃውሞ ሰልፎች ሲካሄዱ ቆይተዋል።

የተቃውሞው መጠናከርና የአዝማሚያውን መቀየር ተከትሎም በነዳጅ ላይ የተጣለው ግብር በዛሬው እለት ይነሳል ተብሏል።

ጠቅላይ ሚኒስትር ኤድዋርድ ፊሊፔም የመንግስታቸውን ውሳኔ በዛሬው እለት ይፋ ያደርጋሉ ተብሎ ይጠበቃል።

የሃገሪቱ እለታዊ ጋዜጣ ለ ሞንድ ጋዜጣ በበኩሉ የግብር እገዳው በርካታ ወራቶችን ሊቆይ እንደሚችል ባለስልጣናቱን ዋቢ አድርጎ አስነብቧል።

በፈረንሳይ የነዳጅ ግብሩን ለመቃወም በተጠራ ሰልፍ እስካሁን የሶስት ሰዎች ህይዎት ማለፉ ይነገራል።

 

 

ምንጭ፦ ሬውተርስ እና ቢቢሲ

You might also like
Comments
Loading...