Fana: At a Speed of Life!

ዩኒቨርሲቲዎች በሀገሪቱ ሰላምና አንድነት ላይ ተጨማሪ እሴት የሚያበረክት ትውልድ ሊያፈሩ እንደሚገባ ተገለፀ

አዲስ አበባ፣ ህዳር 27፣ 2011 (ኤፍ.ቢ.ሲ) ዩኒቨርሲቲዎች  ከማንኛውም የፖለቲካ ተልዕኮ ማራመጃነት ርቀው በሀገሪቱ ሰላምና አንድነት ላይ ተጨማሪ እሴት የሚያበረክት ትውልድ ሊያፈሩ እንደሚገባ የሰመራ ዩኒቨርሲቲ ገለፀ።

ዩኒቨርሲቲው  በሰላማዊ የመማር ማስተማር ስራው ላይ ችግር በሚፈጥሩ ጉዳዮች ላይ ከዩኒቨርሲቲው ማህበረሰብና  ከአካባቢው ነዋሪ ተወካዮች ጋር ውይይት እያደረገ ይገኛል።

በዚህ ወቅት የዩኒቨርሲቲው  ምክትል ፕሬዚዳንት አሊ ሁሴን እንደተናገሩት፥ ተማሪዎች ወደ ዩኒቨርሲቲ በሚገቡበት ወቅት የተጣለባቸውን ቤተሰባዊና ሀገራዊ  አላማ  በብቃት እንዲወጡ በሚማሩበት አካባቢና በመካከላቸው  አስተማማኝ ሰላም መገንባት ይጠበቅባቸዋል ሲሉ ገልጸዋል።

በውይይቱ የተሳተፉ ምሁራን፣ የፀጥታ አካላትና  የዩኒቨርሲቲው ማህበረሰብ ተወካዮች በበኩላቸው፥ ዩኒቨርሲቲዎች የመማሪያና የመመራመሪያ ስፍራ  እንጂ የፖለቲካ መድረክ መሆን አይገባቸውም ብለዋል።

የክልሉ  ህዝብም በሰላም ዙሪያ ከዩኒቨርሲቲው ጋር ተቀራርቦ መስራት በሚችልባቸው ጉዳዮች ላይ ምክክር አድርጓል።

በነገው እለት የሃይማኖት አባቶች፣  የሀገር ሽማግሌዎች እና ተማሪዎችን  ጨምሮ ከዩኒቨርሲቲ ውጪ ከሚኖሩ 2 ሺህ የህብረተሰብ  ክፍሎች ጋር ውይይቱ እንደሚደረግም ተገልጿል።

በሶዶ ለማ

You might also like
Comments
Loading...