Fana: At a Speed of Life!

የየመን የሰላም ድርድር በስዊድን መካሄድ ሊጀመር ነው

አዲስ አበባ፣ ህዳር 27፣ 2011 (ኤፍ.ቢ.ሲ) የየመን የሰላም ድርድር በስዊድን መካሄድ ሊጀምር መሆኑ ተነግሯል።

በተባበሩት መንግስታት ድርጅት ድጋፍ የሚካሄደው ድርድሩ ለአራት ዓመታት የዘለቀውን የሀገሪቱን ጦርነት ለማስቆም ያለመ ነው ተብሏል።

የሰላም ድርድር እንዲጀምርም የተባበሩት መንግስታት ድርጅት ሰራተኞች ቡድን ከየመን መንግስት እና ከሀውቲ ታጣቂ ቡድን ጋር እየሰሩ መሆኑንም ገልፀዋል።

ሁለቱን ቡድኖች እንደ አውሮፓውያኑ ከ2016 ወዲህ ለመጀመሪያ ጊዜ የማወያየት ስራ መጀመሩም ነው የተነገረው።

ሁለቱን ወገኖች ለማደራደር ለመጨረሻ ጊዜ የተሞከረው በጄኔቫ ሲሆን፥ ድርድሩ ሳይካሄድ የቀረውም የሀውቲ አማፅያን ቡድን ተደራዳሪዎች ወደ ጄኔቫ ባለማቅናታቸው ነው።

አሁን ከሚደረገው የሰላም ድርድርም ውሳኔ አይጠበቅም የተባለ ሲሆን፥ በአማፅያን በተያዘ የቀይ ባህር ክልል በሆነችው ሁዳይዳህ ውስጥ ታግተው የሚገኙ ዜጎችን ጉዳይ ላይ ግን እልባት እንደሚያስቀምጥ ተስፋ ተጥሎበታል።

በተጨማሪም የየመን የፖለቲካ መፍትሄ ምን እንደሚመስል አቅጣጫ የሚቀመጥበት እንደሚሆንም የተባበሩት መንግስታት ደርጅት ተስፋ አድርጎበታል።

ባለፉት ዓመታት በየመን ሲካሄድ የነበረው የእርስ በእርስ ጦርነት በሺህዎች የሚቆጠሩ ዜጎችን ለህልፈት የዳረገ ሲሆን፥ በሚሊየን የሚቆጠሩ የሀገሪቱን ዜጎች ደግሞ ለረሃብ መዳረጉ አይዘነጋም።

ምንጭ፦ www.bbc.com

You might also like
Comments
Loading...