Fana: At a Speed of Life!

የዓለም ነዳጅ አምራች ሀገራት ድርጅት የነዳጅ ምርት ላይ ቅነሳ ሊያደርግ እንደሚችል ተጠቆመ

አዲስ አበባ፣ ህዳር 27፣ 2011 (ኤፍ.ቢ.ሲ) የዓለም ነዳጅ አምራች ሀገራት ድርጅት የነዳጅ ምርት ላይ ቅነሳ ሊያደርግ እንደሚችል ተጠቆመ፡፡

የዓለም ነዳጅ አምራች አባል ሀገራት ድርጅት አሁን ላይ በዓለም ገበያ የታየውን የነዳጅ ምርት የዋጋ ቅናሽ ምክንያት በማድረግ የምርት ቅነሳ ሊያደርጉ እንደሚችሉ ተነግሯል፡፡

ባሳለፍነው የፈረንጆቹ ጥቅምት ወር በበርሜል 86 የአሜሪካን ዶላር ደርሶ ነበረው የነዳጅ ድፍድፍ ዋጋ አሁን ላይ ወደ 60 ዶላር ዝቅ ማለቱ ታውቋል፡፡

የኦፔክ አባል ሀገራት ተወካዮች በዛሬው ዕለት በነዳጅ ምርት ቅነሳ ላይ ያተኮረ ስብሰባ በቬና በማካሄድ ላይ ይገኛሉ፡፡

የዓለም ነዳጅ ምርትን በከፊል የሚያቀርቡት እነዚህ የነዳጅ ዘይት አምራች አባል ሀገራቱ የነዳጅ ምርታቸውን በመቀነስ የወረደውን የነዳጅ ዋጋ የመጨመር እቅድ እንዳላቸው ተጠቁሟል፡፡

ተሰብሳቢዎቹ ስብሰባቸውን ከመጀመራቸው ከሰዓታት በፊት ፕሬዚዳንት ትራምፕ ለነዳጅ አምራች ሀገራቱና ለአጋሮቻቸው የነዳጅ ዘይት ምርት ላይ ቅነሳ እንዳያደረጉ መጠየቃቸው ታውቋል፡፡

የነዳጅ ዘይት ዋጋም በዚሁ መቀጠል እንዳለበት ሀገራቱን ያሳሰቡት ትራምፕ ሀገራቱ አሁን ላይ ባለው ነዳጅ ምርት አቅርቦት ሂደት እንደሚቀጥሉም ተስፋቸውን ገልጸዋል፡፡

የሳዑዲ አረቢያ ነዳጅ ሚኒስትር ካሃሊድ አል ፋሊህ በበኩላቸው ለነዳጅ ዘይት አምራች ለአባል ሀገራቱ የሚስፈልገውን የፖሊሲ አማራጭ አሜሪካ ልትነግረን አይገባም ብለዋል፡፡

የነዳጅ ዘይት አባል ሀገራቱ የምርት ሂደቱ ላይ ቅናሽ ለማድረግም ከማንኛውም አካል ፈቃድ የማያስፈልግ መሆኑንም አስረድተዋል፡፡

የኦማን እና ናይጄሪያ ነዳጅ ዘይት ሚኒስትሮችም የነዳጅ ዘይት ምርት ሂደቱ ላይ ቅነሳ መደረግ እንዳለበት ስምምነታቸውን መግለፃቸው ታውቋል፡፡

ይሁን እንጂ ምን ያህል ቅናሽ መደረግ አንዳለበት እስካሁን ድረስ ስምምነት ላይ እንዳልተደረሰ ነው ዘገባው የሚያመለክተው፡፡

ዋና ዋና የነዳጅ ዘይት አምራች ሀገራት በበኩላቸው ቢያንስ በቀን እስከ 1ነጥብ 3 ሚሊየን በርሜል ምርት የመቀነስ ሃሳብ እንዳላቸው ተጠቁሟል፡፡

ምንጭ፣ አል ጀዚራ

You might also like
Comments
Loading...