Fana: At a Speed of Life!

የአፍሪካ ቻይና የንግድና ኢንቨስትመንት ትርኢት በኤግዚቪሽን ማዕከል ተጀመረ

አዲስ አበባ ፣ ህዳር 24 ፣ 2011 (ኤፍ ቢ ሲ) ለመጀመሪያ ጊዜ የተዘጋጀው የአፍሪካ ቻይና የንግድና ኢንቨስትመንት ትርኢት ዛሬ በአዲስ አበባ ኤግዚቪሽን ማዕከል ተከፍቷል።

በንግድ ትርኢቱ ላይ ከ40 በላይ የሚሆኑ እና በተለያዩ ፕሮጀክቶች ላይ የተሰማሩ የቻይና ኩባንያዎች ተሳታፊዎች ናቸው።

የኢትዮ- ቻይና የኢንዱስትሪ አቅም የማጎልበት ትብብር ትርዒት የሚል ስያሜ የተሰጠው የንግድና ኢንቨስትመንት ትርኢት፥ በኢትዮጵያና በቻይና መካከል ያለውን የንግድ እና ኢንቨስትመንት አጋርነት ወደ ላቀ ደረጃ ለማሸጋገር ያለመ መሆኑ ተነግሯል።

ከዚህ ባለፈም የአፍሪካ ቻይና ትብብር መድረክ ላይ የተላለፉ ውሳኔዎችን መሰረት አድርጎ የተዘጋጀ መሆኑም ነው የተነገረው።

የኢትዮጵያ የንግድና ዘርፍ ማህበራት ምክር ቤት ፕሬዚዳንት ኢንጅነር መላኩ እዘዘው፥ የንግድ ትርዒቱ አዳዲስ ኩባንያዎችን ለመሳብ እንደሚያስችል ተናግረዋል።

ከዚህ ባለፈም በሁለቱ ሀገራት የቢዝነስ ማህበረሰብ መካከል የገበያ ትስስርን በመፍጠር፥ ለቴክኖሎጂ ሽግግር እንደሚረዳም ነው የተናገሩት።

በቻይና የዓለም አቀፍ ንግድ ማስፋፊያ ምክር ቤት ኃላፊ ሄ ሴሎንግ በበኩላቸው፥ ትርዒቱ የቻይና – አፍሪካ የጋራ ተጠቃሚነት ማጎልበቻ፣ የሁለገብ ትብብር ማጠናከሪያ እና የንግድና የኢኮኖሚ አጋርነት ማሳያ መሆኑን ገልጸዋል።

አያይዘውም ቻይና በአፍሪካ ውስጥ ያላትን ገንቢ ሚና አጠናክራ እንደምትቀጥልም አንስተዋል።

የንግድ ትርኢቱ ተሳታፊ ኩባንያዎች በኢትዮጵያ በተለያዩ የኢንቨስትመንት አማራጮች እንዲሰማሩ የሚያስችል መሆኑም ተገልጿል።

በንግድ ትርኢቱ መክፈቻ ላይም በዘርፉ በተሰማሩ የኢትዮጵያ እና ቻይና ኩባንያዎች መካከል የንግድ ስምምነቶች ተፈርመዋል።

ተሳታፊ ኩባንያዎቹ የግንባታ ማሽነሪዎች እና ግብአቶችን፣ የውሀ ማጣሪያዎችን፣ የኤሌክትሮኒክስ፣ የሶላር እና የቆዳ ምርቶችን አቅርበዋል።

የንግድ ትርኢቱ ከዚህ በኋላ በየአመቱ እንዲካሄድም ስምምነት ላይ ተደርሷል።

የቢዝነስ ለቢዝነስ መድረክ፣ የኢንቨስትመንት ማስተዋወቂያ መድረክ እንዲሁም የኢንዱስትሪ ፓርኮች ጉብኝት የትርዒቱ አካል እንደሆኑ በመድረኩ ላይ ተገልጿል።

በቢዝነስ ለቢዝነስና በኢንቨስትመንት መድረኮቹ ላይ በኢትዮጵያ ስላሉ የቢዝነስ እድሎች ማብራሪያ የሚሰጥ ሲሆን፥ የኢትዮጵያና የቻይና ኩባንያዎች በጋራ ሊሰሩባቸው በሚችሉት የኢንቨስትመንት መስኮች ላይ ትስስር ይፈጥራሉ ተብሏል።

መድረኩ የተዘጋጀው በኢትዮጵያ የንግድና ዘርፍ ማህበራት ምክር ቤት፣ በቻይና የዓለም አቀፍ ንግድ ማስፋፊያ ምክር ቤት፣ በቻይና አለም አቀፍ ኤግዚቪሽን ማዕከል እና በቻይና አፍሪካ የልማት ፈንድ ትብብር ነው።

 

 

በዙፋን ካሳሁን፤ ተጨማሪ መረጃ ከውጭ ጉዳይ ሚኒስቴር ቃል አቀባይ ፅህፈት ቤት

 

You might also like
Comments
Loading...