Fana: At a Speed of Life!

የባሏን ፍቅር ለመለካት በማሰብ ልጃቸው በሀሰት እግታ እንደደረሰበት ያስመሰለችው ግለሰብ ለእስር ተዳረገች

አዲስ አበባ፣ ታህሳስ 1፣ 2011 (ኤፍ.ቢ.ሲ) በቻይና የባሏን ፍቅር ለመለካት በማሰብ በሀሰት የ11 ዓመት ልጃቸው እንደታገ በማስመሰል ለባለቤቷ የተናገረችው ግለሰብ ለእስር ተዳረገች፡፡

የ33 ዓመቷ ግለሰብ ሼን ትባላለች ከባለቤቷ ጋርም ሰሞነኛ ጸብ ውስጥ እንደነበሩ ተነግሯል፡፡

እናት ልጃቸው ተሰወረ ባለችበት ወቅት ትምህርት ቤት አካባቢ ለመጨረሻ ጊዜ መታየቱንና የለበሰውን የልብስ ዓይነት ለፖሊስ አስታውቃ ነበር፡፡

ጉዳዩ ወደ ፖሊስ መድረሱን ተከትሎ ታዲያ በሀገር ደረጃ መነጋገሪ ለመሆን ጊዜ አልፈጀበትም፡፡

ምክንያቱ ደግሞ ልጁን ፈልጎ ላገኘ ሰው ቤተሰቦቹ ለመስጠት ቃል የገቡት 72 ሺህ የአሜሪካ ዶላር ነው ተብሏል፡፡

እገታ በቻይና አሳሳቢ እየሆኑ ከመጡ ጉዳዮች መካከል አንዱ ሲሆን፥ በየዓመቱ 70 ሺህ የሚደርሱ ታዳጊዎች በጥቁር ገበያ እንደሚሸጡ መረጃዎች ያመለክታሉ፡፡

በዚህም ምክንያት የታዳጊው እገታ ከቤተሰቦቹ ተሻግሮ የከተማዋን ህዝብ አስጨንቆ እንደነበር ተነግሯል፡፡

በመጨረሻም ፖሊስ በትምህርት ቤቱ አካባቢ የተገጠሙ ሲሲቲቪ ካሜራዎችን ከተመለከተ በኋላ እናትየው በሐሰት እገታውን ማቀነባበሯን ሊደርስበት ችሏል፡፡

የ11 ዓመቱ ልጅም ከአምስት ቀናት በኋላ መሆኑ ነው፤ ሰውን ጭንቀት ውስጥ ያስገባው እገታ ሳይደርስበት ቤተዘመድ ቤት ውስጥ በሰላም ተገኝቷል፡፡

ግለሰቧም ሆነ ብላ የሐሰት መረጃን በመንዛት በሚል ክስ ቀርቦባት ለእስር መዳረጓን ፖሊስ ገልጿል፡፡

የከተማው ህዝብ በበኩሉ በልጁ ሰላም መሆን ደስተውን ቢገልጽም እናት የፈጸመችው ድርጊት ተገቢነት የጎደለው ነው ሲል ወቀሳውን ሰንዝሯል፡፡

ምንጭ፦ኦዲቲይ

በአብርሃም ፈቀደ

You might also like
Comments
Loading...