Fana: At a Speed of Life!

የቀድሞ ፕሬዚዳንት ግርማ ወልደጊዮርጊስ የቀብር ስነ ስርዓት የፊታችን ረቡዕ ይፈፀማል

አዲስ አበባ፣ ታህሳስ 6፣ 2011 (ኤፍ.ቢ.ሲ) የቀድሞ ፕሬዚዳንት ግርማ ወልደጊዮርጊስ የቀብር ስነ ስርዓት የፊታችን ረቡዕ እንደሚፈፀም መንግሥታዊ የቀብር ሥነ ሥርዓትን ለማስፈፀም ተቋቋመው ኮሚቴ አስታወቀ።

የቀብር ስነ ስርዓቱም የፊታችን ረቡዕ ታህሳስ 10 2011 ዓ.ም በመንበረ ጸባዖት ቅድስት ስላሴ ካቴድራል ከቀኑ 9 ሰዓት ላይ የሀገሪቱ ከፍተኛ ባለስልጣናት እና ወዳጅ ዘመዶቻቸው በተገኙበት እንደሚፈፀመም ኮሚቴው ገልጿል።

ከዚያ ቀደም ብሎም ህዝቡ በተገኘበት ለአስከሬናቸው አሸኛኘት ስነ ስርዓት የሚደረግ ሲሆን፥ ጊዜው እና ቦታው ወደፊት እንደሚገለፅም ነው ያመለከተው።

በአዋጅ ቁጥር 653/2009 አንቀፅ 11 ላይ በተደነገገው መሰረትም በመላው ሀገሪቱ የ1 ቀን ብሄራዊ ሀዘን የሚታወጅ ይሆናል።

የኢፌዴሪ የህዝብ ተወካዮች ምክር ቤት የፊታችን ማክሰኞ ታህሳስ 9 ቀን 2011 ዓ.ም በሚያደርገው ስብሰባው ብሄራዊ የሀዘን ቀኑን እንደሚያውጅ ይጠበቃል።

ይህንን ተከትሎም የሀገሪቱ ሰንደቅ ዓላማ በመላው ሀገሪቱ እንዲሁም በውጭ ሀገራት በሚገኙ የኢትዮጵያ ኤምባሲዎች እና ቆንስላዎች ዝቅ ብሎ እንዲውለበለብ የሚደረግ ይሆናል።

የቀብር ስነ ስርዓታቸውም ለክብራቸው እና ለሀገራቸው ላበረከቱት አስተዋጽኦ በሚመጥን መልኩ እንደሚከናወንም ተገልጿል።

ይህንን ለመፈፀምም የተቋቋመው 11 ዓባላት ያሉት ብሄራዊ ኮሚቴ የተዋቀረው ኮሚቴ አባላትም ከጠቅላይ ሚኒስትር ጽህፈት ቤት፣ ከውጭ ጉዳይ ሚኒስቴር፣ ከገንዘብና ኢኮኖሚ ልማት ሚኒስቴር፣ ከፌደራል ፖሊስ እና ከሀገር መከላከያ የተውጣጡ መሆናቸው ነው የተመለከተው።

የቀድሞ ፕሬዚዳንት ግርማ ወልደጊዮርጊስ ባደረባቸው ህመም ምክንያት በህክምና ሲረዱ ቆይተው ታህሳስ 5 ቀን 2011 ዓ.ም ከሌሎቱ 10 ሰዓት ከ30 ላይ በጦር ሀይሎች ሆስፒታል ነው ህይወታቸው ያለፈው።

የኢፌዴሪ የቀድሞ ፕሬዚዳንት ግርማ ወልደጊዮርጊስ ታህሳስ 19 ቀን 1917 ዓ.ም ነበር በአዲስ አበባ ከተማ የተወለዱት።

የቀድሞ ፕሬዚዳንት ግርማ ወልደጊዮርጊስ ከ1994 እስከ 2006 ዓ.ም ድረስ ለ12 ዓመታት ኢትዮጵያን በርዕሰ ብሄርነት አገልግለዋል።

 

በአልአዛር ታደለ

 

You might also like
Comments
Loading...