Fana: At a Speed of Life!

የሁዋዌ የፋይናንስ ኃላፊ እስር ፖለቲካዊ አንድምታ የለውም – ጀስቲን ትሩዶ

አዲስ አበባ፣ ህዳር 28፣ 2011 (ኤፍ.ቢ.ሲ) የካናዳው ጠቅላይ ሚኒስትር ጀስቲን ትሩዶ የሁዋዌ የፋይናንስ ኃላፊ ሜንግ ዋንዞህ እስር ፖለቲካዊ አንድምታ እንደሌለው አስታወቁ፡፡

ጠቅላይ ሚኒስትር ትሩዶ በእስሩ መንግስታቸው ጣልቃ ያለመግባቱንም ጨምረው ገልጸዋል፡፡

ቻይና በበኩሏ እስሩ የሰብዓዊ መብት ጥሰት መሆኑን ጠቅሳ፥ ምክትል ስራ አስኪያጇ በአስቸኳይ እንዲለቀቁ ጥሪ አቅርባለች፡፡

ሜንግ ዋንዞህ የሁዋዌ ኩባንያ መስራች ልጅ ሲሆኑ፥ በኩባንያው ውስጥ የፋይናንስ ኃላፊ በመሆን እያገለገሉ ይገኛሉ፡፡

ግለሰቧ ባለፈው ሳምንት መጨረሻ በቁጥጥር ስር የዋሉ ሲሆን፥ ከትናንት በስቲያ ረቡዕም ፍርድ ቤት ቀርበዋል።

የካናዳ ፍትህ ሚኒስቴር በበኩሉ ሜንግ ለአሜሪካ ተላልፈው ሊሰጡ እንደሚችሉ ጠቅሷል፤ የግለሰቧ የዋስትና ጉዳይም ዛሬ የሚታይ ይሆናል።

እስራቸው ምናልባትም በኢራን ላይ የተጣለውን ማዕቀብ በመጣሳቸው ሳይሆን አይቀርም እየተባለ ይገኛል፡፡

ከብሄራዊ ደህንነት ጋር በተያያዘም የአሜሪካ ህግ አውጭዎች በኩባንያው ላይ በተደጋጋሚ ቅሬታ የሚያሰሙ ሲሆን፥ ኒውዝላንድና አውስትራሊያ የኩባንያውን ምርቶች ማገዳቸው ተሰምቷል፡፡

እስሩ በዚህ ወቅት መሆኑ ደግሞ አሜሪካ እና ቻይና የገቡበትን የንግድ ጦርነት ይበልጥ እንዳያባብሰው ተሰግቷል።

ከዚህ በተጨማሪም አሜሪካና ቻይና ባለፈው ሳምንት በቡድን 20 ሀገራት ስብሰባ ወቅት የፈፀሙትን የሁለትዮሸ ስምምነት ተግባራዊ  እንዳይሆን ያደርገዋል እየተባለም ይገኛል።

ምንጭ፦ቢቢሲና አልጀዚራ

በአብርሃም ፈቀደ

You might also like
Comments
Loading...