Fana: At a Speed of Life!

ወደ ቤተ መንግስት ያለፈቃድ ካቀኑ ወታደሮች ውስጥ 66ቱ ላይ የተላለፈባቸው ዝርዝር ቅጣት ይፋ ሆነ

አዲስአበባ፣ ታህሳስ 6፣ 2011(ኤፍ.ቢ.ሲ) መስከረም 30 ቀን 2011 ዓ.ም ከነትጥቃቸው ያለፈቃድ ወደ ወደ ጠቅላይ ሚኒስትር ጽህፈት ቤት ካመሩት 200 የሰራዊት አባላት መካከል 66ቱ ላይ ከ5 እስከ 14 ዓመት የሚደርስ ጽኑ እስራት ተፈረደባቸው፡፡

የመከላከያ ፍትህ ዳይሬክቶሬት ዳይሬክተር ኮለኔል መሸሻ አረዳ ከወታደራዊ አቃቤ ህግና ከተከላካይ ጠበቃ ጋር በጋራ ጋዜጣዊ መግለጫ ሰጥተዋል፡፡

ዳይሬክተሩ እንደገለጹት ከ500 ሰው በላይ በተገኘበት ግልጽ ችሎት ፍርድ ቤቱ ውሳኔውን ማስተላለፉን አንስተዋል።

በመግለጫቸውም አንድ ተከሳሽ በ14 ዓመት ጽኑ እስራት፣ ሦስት ተከሳሾች በ13 ዓመት ጽኑ እስራት፣ 11 ተከሳሾች በ12 ዓመት ጽኑ እስራት፣ 12 ተከሳሾች በ11 ዓመት ጽኑ እስራት፣ አራት ተከሳሾች በ10 ዓመት ጽኑ እስራት፣ 16 ተከሳሾች ከ9 ዓመት እስከ ዘጠኝ ዓመት ከስድስት ወር ጽኑ እስራት፣ ሁለት ተከሳሾች በስምንት ዓመት ጽኑ እስራት፣ 10 ተከሳሾች ከሰባት ዓመት ከስድስት ወር እስከ ሰባት ዓመት ጽኑ እስራት፣ አምስት ተከሳሾች ከስድስት ዓመት ከስምንት ወር እስከ ስድስት ዓመት እና አንድ ተከሳሽ በአምስት አመት ጽኑ እስራት መቀጣታቸውን ገልጸዋል።

በተጨማሪም ከ66ቱ በተጨማሪ ሌሎቹ የሰራዊት አባላት አስተዳደራዊ ቅጣት ተወስኖባቸዋል።

የወታደራዊ አቃቤ ህጉ ሻምበል ኃይለማርያም ማሞ ሌሎችንም ሊያስተምር በሚችል ቅጣት እንደተላለፈባቸው ጠቅሰዋል።

ተከላካይ ጠበቃ ደሳለኝ ዳካ ተጠርጣሪዎቹ ከፍርድ እስከ ውሳኔ በነበረው ሂደት ህግመንግስታዊ አካሄድን በተከተለ መልኩ መካሄዱን ገልጸው፥ በአንዳንድ ጥፋተኛ በተባሉት ላይ ይግባኝ ለመጠየቅ በዝግጅት ላይ መሆናቸውን ገልጸዋል።

በዚህ ሳምንት አንዳንድ የመገናኛ ብዙኀን ወታደሮቹን በተመለከተ ተወስዶባቸዋል የተባለው እርምጃ ሀሰተኛ መሆኑን ገልጸው የሰራዊቱን ስም የማጠልሸት ተግባር በመሆኑም ሊታረም እንደሚገባ አሳስበዋል።

በመለሰ ምትኩ

You might also like
Comments
Loading...