Fana: At a Speed of Life!

ኢትዮጵያ ባለፉት አስር ዓመታት በሙስና ምክንያት 7 ቢሊየን ዶላር ማጣቷ ተገለጸ

አዲስ አበባ፣ ታህሳስ 5፣ 2011 (ኤፍ. ቢ.ሲ) ባለፉት አስር ዓመታት ኢትዮጵያ በሙስና ምክንያት 7 ቢሊየን ዶላር ማጣቷ ተገለፀ።

በዓለም ለ15ኛ ጊዜ፣ በሀገራችን ደግሞ ለ14ኛ ጊዜ ዓለም አቀፍ የጸረ ሙስና ቀን በዛሬው ዕለት በኢትዮጵያ የአዕምሯዊ ንብረት ጽህፈት ቤት ተከብሯል፡፡

በዓሉ “ሁለንተናዊ ልማታችንና ሰላማችንን ለማረጋገጥ በሙስና ላይ እንዝመት፣ ጊዜው የተግባር ነው”’ በሚል መሪ ቃል ነው የተከበረው።

በዚህ ወቅትም ሙስና በህዝቦች ልማት፣ ሰላምና አንድነት ላይ የሚያደርሰው ጉዳት ከፍተኛ መሆኑ እየታወቀ፥ የተሰጠው ትኩረትና ችግሩን ከስሩ ለማድረቅ እየተሰራ ያለው ስራ አነስተኛ መሆኑም ተነስቷል።

ችግሩን ለመቅረፍም በየጊዜው ህጎችን በማርቀቅ ስራ ላይ እንዲውል ቢደረግም አመርቂ ውጤት ማግኘት እንዳልተቻለም በመድረኩ ላይ ተገልጿል።

የሃገራችንን ልማትና ሰላም ለማረጋገጥ የዴሞክራሲና የፍትህ ተቋማትን እንዲሁም የኢኮኖሚ መዋቅሮችን በፅኑ መሰረት ላይ መገንባት፣ ሙስናና ኢ-ስነምግባራዊ ድርጊቶች በሂደት እየከሰሙ የሚሄዱበትን ዘላቂ አሰራር መተግበር ይገባል ተብሏል።

ለዚህም እያንዳንዱ ዜጋ ሙስናን በመፀየፍ፣ ልማትን በመደገፍ እና ብልሹ አሰራሮችን በማጋለጥ ለተጀመረው ለውጥ አጋዥ እንዲሆን ጥሪ ቀርቧል።

በአሸብር ካሳሁን

You might also like
Comments
Loading...