Fana: At a Speed of Life!

ኢትዮጵያ በፍራንኮ ቫሉታ 14 ነጥብ 3 ቢሊየን  ብር ማጣቷ ተገለፀ

አዲስ አበባ ህዳር 25፣2011 (ኤፍ.ቢ.ሲ) ከመሃል ሀገር ለሚርቁና የመሰረተ ልማት ላልተሟላላቸው  የጠረፍ አካባቢ  ማህበረሰቦች  የተፈቀደው ፍራንኮ ቫሉታ ከታለመለት አላማ ውጪ እየዋለ በመሆኑ  ቁጥጥር እንደሚያስፈልገው ተገለፀ።

የፍራንኮ ቫሉታ አላማ  ከመሃል ሃገር ለሚርቁና የመሰረተ ልማት ለማይዳረስባቸው ጠረፍ አካባቢ ላሉ ማህበረሰብ  ክፍሎች የእለት ፍጆታ እቃዎች እና ባህላዊ አልባሳት በቀላሉ እንዲያገኙ ታስቦ የተፈቀደ ነው፡፡

ይሁን እንጂ በድንበር የጉሙሩክ ስርአትን ተከትለው ከቀረጥ ነጻ የሚገቡት የፍጆታ እቃ ምርቶች ከታለመላቸው አላማ ውጪ መዳረሻቸው መሃል ሀገር በማድረግ የኮንትሮባንድ ምንጭ እየሆነ መምጣቱን የገቢዎች ሚኒስትር ዴኤታ አቶ ዘመዴ ተፈራ አስታውቀዋል።

ሚኒስትር ዴኤታው ከፈረንጆቹ  2015 እስከ 2018 አጋማሽ ድረስ  በፍራንኮ ቫሉታ ምክንያት ከ14 ነጥብ 3 ቢሊየን ብር በላይ መንግስት ማጣቱን ገልፀዋል።

መንግስት ማግኘት የሚገባውን ገቢ ከማጣቱም በላይ ዜጎችን ለመደገፍ ታስቦ በከፍተኛ የውጪ ምንዛሬ የሚገቡት የፍጆታ እቃዎች ከቀረጥ ነጻ የጉሙሩክ ስርአትን ካለፉ በኋላ  መሀል ሀገር ላይ ከታለመላቸው አላማ ውጪ እየተሸጡ ነው ብለዋል።

መንግስት ስርዓቱ ያለ አግባብ የጥቂት ግለሰቦች መበልፀጊያ ሲሆን ፥ ዝም ብሎ እንደማይመለከት ከፋና ብሮድካስቲንግ ኮርፖሬት ጋር ቆይታ ያደረጉት  የገቢዎች ሚኒስትር  ወይዘሮ አዳነች አቤቤ ተናግረዋል።

የፍራንኮ ቫሉታ ተጠቃሚ  የሆኑ አካባቢዎችን ጥቅም ባስጠበቀ መልኩ በጥንቃቄ  አስመጪዎች  ፍቃድ አሰጣጥ  ጀምሮ ወደ ሀገር ውስጥ ምርቱን ይዘው እስከሚደርሱባቸው የጠረፍ አካባቢዎች ጥብቅ ክትትል እንደሚደረግ ነው ሚኒስትሯ የገለፁት።

ሚኒስትሯ  ፍራንኮ ቫሉታን  ከታለመለት አላማ ውጪ በማዋል ላይ የአመራሮች ተሳትፎ ያለበት በመሆኑ  ጥብቅ ክትትል በማድረግ  የችግሩን ስረ መሰረት  በመፍታት  ለዜጎች የተፈቀደውን  ፍጆታ እቃ ለታለመለት አላማ እንዲውል ይደረጋል ብለዋል።

በፀጋ ታሪኩ

You might also like
Comments
Loading...