Fana: At a Speed of Life!

ኢትዮጵያና የአፍሪካ ልማት ባንክ የ15 ሚሊየን ዶላር የድጋፍ ስምምነት ተፈራረሙ

አዲስ አበባ፣ ታህሳስ 4፣ 2011 (ኤፍ.ቢ.ሲ) ኢትዮጵያና የአፍሪካ ልማት ባንክ ለተቀናጀ የግብርና ኢንዱስትሪ ፓርኮች ፕሮጀክት ማስፈፀሚያ የሚውል  የ15 ሚሊየን ዶላር ድጋፍ ስምምነት ተፈራረሙ።

ስምምነቱን በኢትዮጵያ በኩል የገንዘብ ሚኒስትሩ አቶ አህመድ ሽዴ እና  በአፍሪካ ልማት ባንክ በኩል  የባንኩ የኢትዮጵያ ስራ አስኪያጅ ዶክተር አብዱል ካማራ ናቸው የተፈራረሙት።

የአፍሪካ ልማት ባንክ የገንዘብ ድጋፉን ያደረገው በኢትዮጵያ በግብርና – ኢንዱስትሪ ዙሪያ እየተከናወኑ ያሉ ፕሮጀክቶችን ለመደገፍ ነው፡፡

የአፍሪካ ልማት ባንክ ድጋፉ በአማራ፣ በኦሮሚያ፣ በትግራይ እና በደቡብ ብሔሮች ብሔረሰቦችና ሕዝቦች ክልላዊ መንግስታት ስር እየተገነቡ ላሉ አራት ኢንዱስትሪ ፓርኮች የሚውል ነው ተብሏል።

ፕሮጀክቱ በኢንዱስትሪ ፓርኮች መሰረተ-ልማትን ለማሳደግ፣ በዘላቂነት የግብርና-ኢንዱስትሪ ልማት ዘርፍ እንዲኖር ለማስቻል፣ በፕሮጀክት አስተዳደርና አተገባበር ላይ ለአራቱ ብሔራዊ ክልላዊ መንግስታትና ለንግድ እና ኢንዱስትሪ የአቅም ግንባታ ስራዎችን ለማከናውን ይውላል፡፡

የገንዘብ ሚኒስትሩ አቶ አህመድ ሽዴ በፊርማ ስነ-ሰርዓት ወቅት እንደተናገሩት ኢትዮጵያ በፈረንጆቹ 2025 መካከለኛ ገቢ ካለቸው የአፍሪካ ሀገራት ተርታ ለመሰለፍ የተለያዩ ፕሮግራሞች ነድፋ እየተንቀሳቀሰች ትገኛለች ብለዋል።

በተለይ ሁሉን አቀፍ እድገት እንዲኖር ማስቻል፣ ድህነት ቅነሳ እና ለወጣቶች የስራ እድል እንዲፈጠር የማድረግ ስራ እያከናወነች ትገኛለች ነው ያሉት።

የገንዘብ ሚኒስትሩ ኢትዮጵያ ወደ ኢንዱስትሪ ልማት በስፋት ለመግባት እያደረገች ላለው ጥረት የአፍሪካ ልማት ባንክ እያደረገው ላለው ድጋፍ ምስጋናቸው አቅርበዋል፡፡

You might also like
Comments
Loading...