Fana: At a Speed of Life!

አብዴፓ የማዕከላዊ ኮሚቴ አባላትን እየመረጠ ነው

አዲስ አበባ፣ ህዳር 28፣ 2011 (ኤፍ.ቢ.ሲ) የአፋር ብሄራዊ ዴሞክራሲያዊ ፓርቲ/አብዴፓ/ 7ኛ መደበኛ ጉባኤ ዛሬ በአምስተኛው ቀን ውሎው የማዕከላዊ ኮሚቴ አባላትን እየመረጠ ይገኛል።

በጉባኤው ረፋድ ላይ 50 እጩ የማዕከላዊ ኮሚቴ አባላት የተጠቆሙ ሲሆን፥ ከእነዚህ መካከልም 45 የድርጅቱ ማእከላዊ ኮሚቴ አባላትን ለመምረጭ ነው ምርጫውን በማካሄድ ላይ የሚገኘው።

በምርጫው ሂደት የፖለቲካ ተሳትፎ እና አቅም ያለው፣ የድርጅቱን ህግና ደንብ ጠንቅቆ የሚያውቅ፣ በፀረ ዴሞክራሲ እና ሰብዓዊ መብት ጥሰት እንዲሁም በሌብነት እና ዘረፋ ላይ በቀጥታም ሆነ በተዘዋዋሪ ያልተሳተፈ፣ አሁን ያለውን ሃገራዊ ለውጥ በቅጡ የሚረዳ አመራር መሆን እንደሚጠበቅበት የሚያመላክቱ መስፈርቶች ተቀምጠዋል።

በተጨማሪም አዲሱ የአብዴፓ አመራር አካባቢውን ታሳቢ ያደረገ ዕቅድ እና ተግባር አውጥቶ በቁርጠኛ አፈፃፀም የሚተገብር እና የተሰጠውን ተልዕኮ በግምባር ቀደምትነት የሚያከናውን መሆን እንደሚጠበቅበት በመስፈርቱ ተጠቅሷል።

የትምህርት ዝግጅት፣ ስነምግባር፣ የሴቶች ተሳትፎ እና የዞኖች ተዋፅዖ መመዘኛው ያካተታቸው ጉዳዮች መሆናቸው ተገልጿል።

ጉባዔው ዛሬ ከሰዓት የሚጠናቀቅ ሲሆን፥ የምርጫው ውጤት ነገ ጧት ይፋ ይሆናል ተብሏል።

 

 

በሶዶ ለማ

You might also like
Comments
Loading...