Fana: At a Speed of Life!

በፈተና ወቅት ረጅም ሰዓት በጥናት ከማሳለፍ ቶሎ መተኛት የተሻለ ውጤት ለማግኘት ያስችላል – ጥናት

አዲስ አበባ፣ ታህሳስ 2፣ 2011 (ኤፍ.ቢ.ሲ) በፈተና ወቅት ረጅም ሰዓት በጥናት ከማሳለፍ ቶሎ መተኛት የተሻለ ውጤት ለማግኘት እንደሚያስችል ተገልጿል።

የቴክሳስ ዩኒቨርሲቲ የነርቭ ሳይንስና የስነ ልቦና ትምህርት ክፍል ረዳት ፕረፌሰር ስኩሊን እንደገለጹት፥ የኮሌጅ ተማሪዎች በፈተና ሰሞን በርካታ ጽሁፎችን ማንበብና ሌሊቱን በጥናት ማሳልፍ በብዙሃኑ ዘንድ ተቀባይነት ያለው ሃሳብ መሆኑን ተናግረዋል።

ይሁን እንጂ በ34 የስነ ልቦና እና በ22 የዲዛይን ተማሪዎች ላይ በተደረገ ጥናት በፈተና ወቅት በአማካይ የ8 ሰዓት እቅልፍ ያገኙ ተማሪዎች የእንቅልፍ ውስንነት ካለባቸው ተማሪዎች የተሻለ ውጤት አስመዝግበዋል።

በቂ እንቅልፍ ያገኙ ተማሪዎች በአማካይ የ5 ነጥብ ያህል ብልጫ ማስመዝገባቸው ነው የተገለጸው።

በብሪንግ ሃም ዩኒቨርሲቲ የልብና እንቅልፍ ጤና ዶክተር የሆኑት ቻርለስ ስሊለር የኮሌጅ ተማሪዎች በአማካይ በቀን ከ5 እስከ 6 ሰዓት ያህል የሚተኙ ሲሆን፥ በዚህ ምክንያትም ተማሪዎቹ ጤናማ አንቅልፍ የማያገኙ መሆናቸውን ጠቁመዋል።

የእንቅልፍ መዛባት ከሌሎች ተጓዳኝ የጤና ጉዳዮች ጋር ተያያዥነት እንዳለው የሚናገሩት ዶክተሩ የፈተና ወቅቶች ሲደርስ የሚደረጉ የጥናት ልምዶች ውጤታማ አለመሆናቸውን ገልጸዋል።

ከላይ በተጠቀሱት ሁለት ቡድኖች ላይ በተደረጉ ጥናቶች መሰረትም ተማሪዎች ተመጣጣኝ፣ በቂና ቀጣይነት ያለው እንቅልፍ ማግኘታቸው ከውጤታማነታቸው በተጨማሪ ለጤናቸው ጠቃሚ መሆኑ ነው የተገለጸው።

ተማሪዎቹ በፈተና ወቅት በጥናት በመጠመድ የእንቅልፍ ጊዜያቸውን በጥናት ከማሳለፍ ይልቅ በቂ እረፍት ማድረግ እንዳለባቸው በጥናቱ ተመላክቷል።

ተማሪዎቹ ቀን ማህበራዊ ሚዲያ ላይ ወይንም ሌላ ቦታ የሚያሳልፏቸውን ጊዜያት በተገቢው መንገድ በመጠቀም ለጥናት ማዋል ጠቃሚ መሆኑምተነግሯል።

ምሽት ላይ የእጅ ስልኮችንም ይሁን ሌሎች የኤሌክትሮኒክስ መሳሪያወችን አስቀምጦ ለቀጣዩ ቀን ፕሮግራም እረፍት ለማድረግ መተኛት አስፈላጊ መሆኑ ነው በጥናቱ የተገለጸው።

ምንጭ፦ ዩ.ፒ.አይ ዶት ኮም

You might also like
Comments
Loading...