Fana: At a Speed of Life!

በደብረ ብርሃን የአዳሪ ትምህርት ቤት ግንባታ ተጀመረ

አዲስ አበባ፣ ታህሳስ 22፣ 2011 (ኤፍ.ቢ.ሲ) በደብረ ብርሃን ከተማ ኃይሌ ማናስ የተባለ የአዳሪ ትምህርት ቤት አካዳሚ ግንባታ ተጀመረ፡፡

በአማራ ክልል በምክትል ርዕሰ መስተዳድር ማዕረግ የባሀልና ቱሪዝም ቢሮ ሃላፊና የፕሮጀክቱ የበላይ ጠባቂ አቶ ንጉሱ ጥላሁን ÷ ትምህርት ቤቱ በ10 ሚሊየን ዶላር ወጪ ግንባታው መጀመሩን ተናግረዋል።

ባለሀብቶች በክልሉ በክፍተት በሚታዩ ዘርፎች ላይ መሳተፋቸውን ያመሰገኑት አቶ ንጉሱ በመሰል ዘርፎች ላይ ለሚሳተፉ ባለሃብቶች መንግስት ድጋፍ እንደሚደርግም ነው የተናገሩት።

ከ40 ዓመታት በላይ በአሜሪካ ሀገር የኖሩት ርብቃ ሃይሌና ቤተሰቦቻቸው አሁን ላይ በሀገሪቱ እየታየ ያለውን ለውጥ ተከትሎ መዋዕለ ንዋያቸውን ሀገራቸው ላይ ለማፍሰስ መነሳሳታቸውን ገልጸዋል።

እንደ ወይዘሮ ርብቃ ገለፃ ያቀረቡትን ፕሮጀክት ዳር ለማድረስ መንግስት እያደረገላቸው ያለው ትብብር ሌሎች ዲያስፖራወች በመሰል ዘርፎች እንዲሰማሩ የሚያበረታታ ነው።

የፕሮጀክቱ የግል አማካሪ ተባባሪ ፕሮፌሰር ፋሲል ጊዎርጊስ በበኩላቸው ትምህርት ቤቱ 8 ሄክታር ላይ የሚያርፍ ሲሆን÷ ጤና ጣቢዎችን፣ የመምህራንና ተማሪዎች መኖሪያ፣ የስፖርት ማዘውተሪያ፣ ቤተ መጽሀፍት እና ቤተ ሙከራዎችን ያካተተ መሆኑን ጠቅሰዋል።

የፕሮጀክቱ ግንባታም በአንድ አመት ውስጥ ይጠናቃል ተብሎ እንደሚጠበቅም ነው የገለጹት፡፡

አዳሪ ትምህርት ቤቱ ከፍተኛ ውጤት የሚያስመዘግቡ 100 ተማሪዎችን በመቀበል ስራውን ይጀምራል ተብሏል።

ትምህርት ቤቱ ከ9 እስከ12ኛ ክፍል ተማሪዎችን የሚቀበል ሲሆን፥ የቅበላ አቅሙም 400 እንደሚያደርስ ይጠበቃል።

 

You might also like
Comments
Loading...