Fana: At a Speed of Life!

በመዲናዋ በሚገኙ የግልና የመንግስት ትምህርት ቤቶች ውስጥ የመማሪያ መፅሃፍት እጥረት መኖሩ ተገለፀ

አዲስ አበባ፣ህዳር 26፣2011( ኤፍ.ቢ.ሲ) በአዲስ አባባ ከተማ በሚገኙ የግልና የመንግስት ትምህርት ቤቶች ውስጥ የመማሪያ መፅሃፍ እጥረት መኖሩ ተገለፀ።

በአዲስ አበባ ከተማ በአሁኑ ወቅት 225 የመጀመሪያ ደረጃ እና 72 የሁለተኛ ደረጃ  የመንግስት ትህምርት ቤቶች እንዲሁም 553 የመጀመሪያ ደረጃ እና 149 የሁለተኛ ደረጃ  የግል ትምህርት ቤቶች መኖራቸውን መረጃዎች ይጠቁማሉ ።

ለእነዚህ ትምህር ቤቶች የመማር መስተማር ሂደትም 2 ነጥብ 7 ሚሊየን የሚደርሱ መማሪያ መፅሃፍት አቅርቦት የሚያስፈልግ መሆኑን ከከተማዋ ትምህርት ቢሮ ያገኘነው መረጃ ያመላክታል።

ይሁን እንጂ በ2011 ዓ.ም የትምህረት ዘመን ላይ በመዲናዋ በሚገኙ የግልና የመንግስት ትምህርት ቤቶች የመማሪያ መፅሃፍ እጥረት ያለባቸው መሆኑ ነው የተገለፀው።

በመዲናዋ በሚገኙ ትምህርት ቤቶች  ዕጥረት ከታየባቸው የመማሪያ መፅሃፍት ውስጥም አማርኛ ፣ሂሳብ እና የተቀናጀ የሳይንስ መማሪያ መፃህፍት እንደሚገኙበት ፋና ብሮድካስቲንግ ኮርፖሬት ባደረገው ቅኝት ለማረጋገጥ ተችሏል።

ይህም  በትምህርት  ቤቶች  የሚኖረውን የመማር ማስተማር ሂደት በእጅጉ እየተፈታተነው መሆኑን  የአዲስ አበባ ከተማ የግል እና የመንግስት ትምህርት ቤቶች አስታውቀዋል።

የተማሪ ወላጆች እና አሳዳጊዎችም በትምህርት ቤቶች ውስጥ የሚስተዋለው የመጽሃፍት ውስንነት ለተጨማሪ ወጪ የዳረጋቸው መሆኑን ነው የተናገሩት ።

በተለያዩ ትምህርት  ቤቶች ያነጋገርናቸው መምህራንም የመፅሃፍት ዕጥረት መኖሩ ተማሪዎች ትምህርታቸውን በተገቢ ሁኔታ እንዳይከታተሉ እያደረገ መሆኑን ጠቁመዋል።

ከዚህ ባለፈም የተከሰተው የመፅሃፍ እጥረት የትምህርት ቤቶችን ዓመታዊ የመማር ማስተማር ዕቅድ እያተስተጓጎለ መሆኑ ነው የተገለፀው።

የአዲስ አበባ ትምህርት ቢሮ ምክትል ሃላፊ አቶ ኤልያስ ገብረየሱስ በበኩላቸው፥ በትምህርት ቤቶች የተከሰተው የመማሪያ መፅሃፍት ዕጥረት የህትመት ጨረታ በመጓተቱ ምክንያት የተከሰተ መሆኑን ተናግረዋል ።

ይህም  የመማሪያ መጽሃፍቱን  ለማሳተም ጨረታ ያሸነፉ ድርጅቶች በተገቢው ጊዜ እና ስዓት ለትምህርት ቢሮው  ማስረከብ  እንዳይችሉ ማድረጉን ሃላፊው ተናግረዋል ።

አሁን ላይ ግን በግልም ሆነ በመንግስት ትምህርት ቤቶች የሚስተዋለውን የመማሪ መጽሀፍት እጥረት በአጭር ቀናት ውስጥ ለመፍታት እተየሰራ መሆኑን አቶ ኤሊያስ ገብረየሱስ አንስተዋል።

በዚህ መሰረትም በቀጣይ አስር ቀናት ውስጥ 1 ሚሊየን የሚጠጉ የመማሪያ መፅሃፍት ለግልና ለመንግስት ትምህርት ቤቶች የሚከፋፈሉ መሆኑን ጠቁመዋል።

በአወል አበራ

You might also like
Comments
Loading...