Fana: At a Speed of Life!

በቡሌሆራ ዩኒቨርሲቲ ተቋርጦ የቆየው የመማር ማስተማር ሂደት ጥር 1 ቀን ይጀመራል

አዲስ አበባ ፣ ታህሳስ 22 ፣ 2011 (ኤፍ ቢ ሲ) የቡሌሆራ ዩኒቨርሲቲ ተቋርጦ የቆየውን የመማር ማስተማር ሂደት ጥር 1 ቀን 2011 ዓ.ም እንደሚጀምር የሳይንስ እና ከፍተኛ ትምህርት ሚኒስቴር ገለጸ።

ባለፉት አመታት የከፍተኛ ትምህርት ተቋማትን ከእውቀት እና ምርምር ማዕከልነት ወደ ግጭት ቀጠናነት የመቀየር አዝማሚያ ሲታይ ቆይቷል።

በቡሌ ሆራ ዩኒቨርሲቲ የተፈጠረ መጠነኛ የተማሪዎች ግጭትም መልኩን እየቀያየረ መጥቷል።

ችግሩን ከዩኒቨርሲቲው እና አካባቢው አመራሮች እንዲሁም ከሀገር ሽማግሌዎች ጋር ለመፍታት የተደረገው ጥረት ጊዜ በመውሰዱ፥ አሁን ላይ ዩኒቨርሲቲው ተማሪዎቹን ለእረፍት መልቀቁን የሳይንስ እና ከፍተኛ ትምህርት ሚኒስትር ዲኤታው ዶክተር ሳሙኤል ክፍሌ ተናግረዋል።

በዩኒቨርሲቲው ውስጥ በተፈጠረው ችግር ከፍተኛ ጉዳት የደረሰባቸው ተማሪዎች አሉ፤ የገቡበት የማይታወቅ ጭምር እንዳሉም ሲነገር ቆይቷል።

ሚኒስትር ዲኤታው በበኩላቸው ተፈጠረ የተባለውን ነገር በዩኒቨርሲቲው ባደረጉት ቆይታ በማስረጃ ማረጋገጥ አለመቻላቸውን ይናገራሉ።

አሁን ላይ በማህበራዊ ሚዲያ የተከፈተው ዘመቻም ተማሪዎችን ላልተፈለገ አላማ ለመጠቀም እየዋለ ነው ብለዋል።

በዩኒቨርሲቲው ለተፈጠረው ችግር መነሻ ቀላል ሊሆን ይችላል ያሉት ሚኒስትር ዲኤታው፥ ከጀርባው ግን በሀብት እና ሰው ሀይል ድጋፍ የሚያደርግ፤ የብሄር መልክ በማስያዝ ለማባላት የሚቆሰቁስ ቡድን አለ ነው ያሉት።

አያይዘውም ለግጭት መንስኤ የሚሆን፣ ተማሪን ከተማሪ የሚያጋጭ፣ ትምህርት የሚያስቆም፣ የሰውን ልጅ ህይወት አደጋ ላይ የሚጥልና ድንጋይ የሚያወራውር እንዲሁም መጠነኛ ኩርፊያ ውስጥ የሚከት ነገር በዩኒቨርሲቲዎች ውስጥ እንደሌለም አንስተዋል።

ይሁን እንጂ ከቅርብ ጊዜ ወዲህ እያንዳንዱ ጥቃቅን ችግር ወደ ግጭት እየገባ የተማሪዎች እና ወላጆች ስጋት እየሆነ መምጣቱን ጠቅሰው፥ በቡሌ ሆራ ዩኒቨርሲቲም ተማሪዎችን መጠቀሚያ እያደረጉ ያሉ አካላት መኖራቸውን ያነሳሉ።

የዩኒቨርሲቲው ሴኔት በቅርቡ ባሳለፈው ውሳኔም ተማሪዎቹ እስከ ጥር 1 ቀን ድረስ በግቢው አልያም ወደ ወላጆቻቸው በማምራት እረፍት እንዲወስዱ ወስኗል።

ለዚህም ዩኒቨርሲቲው የለያቸውን የውስጥ እና የውጭ ችግሮች ለመፍታት ጊዜ ያስፈልገኛል ማለቱን በምክንያትነት ይጠቅሳሉ ዶክተር ሳሙኤል።

ሴኔቱም የወሰነው ይህንኑ ተረድቶ እንጂ አንዳንድ ወገኖች እንደሚሉት የፀጥታ ችግሩ ከዩኒቨርሲቲው አቅም በላይ ሆኖ አይደለምም ነው ያሉት ሚኒስትር ዲኤታው።

ሚኒስትር ዲኤታው በተማሪዎቹ ጉዳት እና ወደ ወላጆቻቸው መመለስ ትርፍ ለማግኘት መሞከር ኢ- ሞራላዊ እና ወንጀል መሆኑንም አውስተዋል።

ቡሌ ሆራን ጨምሮ በተለያዩ ዩኒቨርሲቲዎች ከሚታዩ ችግሮች ጀርባ ያሉ ሀይሎች ትምህርት እንዲቋረጥ እና ተማሪዎች እንዲጎዱ ብቻ ሳይሆን፥ የህዝቦች አብሮነት፣ ተዘዋውሮ የመኖር እና የመስራት መብት አደጋ ላይ መውደቁን ለማሳየት የሚያደርጉት እንቅስቃሴ ሊቆም እንደሚገባም አሳስበዋል።

የተጀመረውን ለውጥ ለማደናቀፍ የሚደረግ አፍራሽ እንቅስቃሴን በመግታቱ ሂደትም ሚኒስቴሩ ከሚያከናውነው ስራ በበለጠ ተማሪዎች እና ወላጆች ሀላፊነታቸው የበዛ ስለመሆኑም ጠቅሰዋል።

የተማሪዎች መጠነኛ ግጭቶችን የብሄር መልክ የማስያዝ እና የመማር ማስተማሩን ሂደት የማደናቀፍ ተግባር ሊቆም እንደሚገባ ያነሳው ሚኒስቴሩ፥ ከሚመለከታቸው አካላት ጋር በመሆንም ህግ የማስከበሩን እና የተማሪዎችን ደህንነት የማስጠበቁን ስራ እንደሚያከናውን አስታውቋል።

 

 

 

በፋሲካው ታደሰ

You might also like
Comments
Loading...