Fana: At a Speed of Life!

በምእራብ አርሲ ዞን የሚገኘው የኤዶ-ሰሮፍታ-ዋርቃ መንገድ ግንባታ በይፋ ተጀመረ

 

አዲስ አበባ፣ ታህሳስ 20፣ 20111 (ኤፍ.ቢ.ሲ) በኦሮሚያ ክልል ምእራብ አርሲ ዞን የሚገኘው የኤዶ-ሰሮፍታ-ዋርቃ መንገድ ግንባታ ዛሬ በይፋ ተጀመረ።

ቀደም ሲል በጠጠር ደረጃ የነበረው ይህ መንገድ ወደ አስፋልት የሚያድግ ይሆናል።

የኢፌዴሪ የውጭ ጉዳይ ሚኒስትር ዶክተር ወርቅነህ ገበየሁና የኢትዮጵያ መንገዶች ባለስልጣን ዋና ዳይሬክተር ኢንጂነር ሀብታሙ ተገኘን ጨምሮ የተለያዩ የፌደራልና የክልል ከፍተኛ የስራ ሀላፊዎች በተገኙበት ግንባታውን የማስጀመር ስነ ስርዓት ተከናውኗል።

መንገዱ 73 ኪሎ ሜትር ርዝመት ያለው ሲሆን፥ ግንባታው በቀጣይ አራት ዓመታት ውስጥ ይጠናቀቃል ተብሎ ይጠበቃል።

የመንገዱ ስፋት በከተማ የመንገድ ትከሻን ጨምሮ ከ12 እስከ 19 ሜትር በገጠር ደግሞ ከ8 እስከ 10 ሜትር ነው።

ለግንባታውም ከ1 ነጥብ 6 ቢሊየን ብር  በላይ በፌደራል መንግስት ተበጅቶለታል።

የኢትዮጵያ መንገዶች ባለስልጣን የኮሙዩኒኬሽን ዳይሬክተር አቶ ሳምሶን ወንድሙ እንደተናገሩትም፥ መንገዱ ዓለማየሁ ከተማ በተባለ ሀገር በቀል የስራ ተቋራጭ የሚከናወን ነው።

መንገዱ በተያዘለት ጊዜ እንዲጠናቀቅ የአካባቢው ህብረተሰብና የአስተዳደር አካላት አስፈላጊውን ድጋፍና ትብብር እንዲያደርጉም ጥሪ አቅርበዋል።

የመንገዱ መገንባት በናንሴቦ ወረዳ በ16 ቀበሌዎች የሚመረቱትን በዓለም ገበያ ተፈላጊነት ያላቸው የቡና ምርቶች ለውጭ ገበያ ለማቅረብ ምቹ ሁኔታ ይፈጥራል ተብሎ ታምኖበታል።

በተጨማሪም አካባቢው በወርቅ፣ በእምነበረድ እና በሌሎች ማዕድናት ሃብት የታደለ በመሆኑ የአካባቢውን ኢኮኖሚያዊ እንቅስቃሴ እንደሚያነቃቃው ነው የተመለከተው።

 

በጥበበስላሴ ጀምበሩ

 

You might also like
Comments
Loading...