Fana: At a Speed of Life!

በህንድ በፈረንጆቹ 2017 በአየር ብክለት ሳቢያ ከ1 ነጥብ 2 ሚሊየን በላይ ሰዎች ሞተዋል

አዲስ አበባ፣ ህዳር 28፣ 2011 (ኤፍ.ቢ.ሲ)  በህንድ በፈረንጆቹ  2017 በአየር ብክለት ሳቢያ የ1 ነጥብ 24 ሚሊየን ሰዎች ህይወት እንዳለፈ አንድ ጥናት አመላከተ፡፡

ይህም በሀገሪቱ በተጠቀሰው ዓመት ከተመዘገበው የሞት መጠን 12 ነጥብ 5 በመቶውን እንደሚሸፍን ነው የተነገረው፡፡

ከሞቱት ውስጥ 670 ሺህ ያክሉ አከባቢ ላይ በደረሰ የአየር ብክለት ሳቢያ ህይዎታቸው ሲያልፍ፥ 480 ሺህ የሚሆኑት ደግሞ ቤት ውስጥ ምግብ በማብሰልና መሰል መንገዶች በተፈጠረ ብክለትና መታፈን ሞተዋል ነው የተባለው።

ለአየር ብክለት ችግር በከፍተኛ ሁኔታ ተጋላጭ ናት የተባለችው የህንዷ ዋና ከተማ ኒው ደልሂ፥ ሳምባ ላይ ጉዳት በሚያደርሱና ለሌሎች ከፍተኛ የጤና እክሎች ምክንያት የሆነ ብክለት ይስተዋልባታል ተብሏል፡፡

ጥናቱ በህንድ የአየር ብክለት የሚያስከትለው ጉዳት መከላከል ቢቻል ኖሮ በ2017 የዜጎች የእድሜ ጣሪያ በ1 ነጥብ 7 አመት እድገት ያሳይ እንደነበር አመላክቷል፡፡

ከዚህ በፊት በቺካጎ ዩኒቨርስቲ የተደረገ ጥናት እንደሚያሳየው ደግሞ ህንዳውያን ለረጅም ጊዜ ለአየር ብክለት ተጋላጭ በመሆናቸው የመኖሪያ እድሜ ጣሪያቸው በአራት አመታት ውስጥ በእጥፍ ቀንሷል።

በአዲሱ ጥናት ህንድ በአለም አቀፍ ደረጃ በአየር ብክለት ምክንያት ከፍተኛ የጤና እክል የሚከሰትባት ሃገር መሆኗ ተመላክታል።

በሀገሪቱ በአየር ብክለት ምክንያት የሚከሰት ሞትና የመኖሪያ እድሜ ጣሪያ እየተሻሻለ  ቢመጣም፥ የሚያስከትለው ጉዳት ግን አሁንም እንደቀጠለ ነው።

ምንጭ፡-አልጀዚራ

You might also like
Comments
Loading...