Fana: At a Speed of Life!

ምርት ገበያው በሚቀጥለው ሳምንት የአኩሪ አተርና የሽምብራ ምርቶችን መረከብ ይጀምራል

አዲስ አበባ፣ታህሳስ 16፣2011 (ኤፍ.ቢ.ሲ) የኢትዮጵያ ምርት ገበያ በሚቀጥለው ሳምንት ጀምሮ የአኩሪ አተርና የሽምብራ ምርት ዘመናዊ የግብይት አገልግሎት መስጠት የሚጀምር መሆኑን አስታወቀ።

ምርት ገበያው ከአርሶ አደሩና ከግብይት ተዋንያኑ በቀረበለት ጥያቄ መሰረት ሽምብርና አኩሪ አተርን ወደ ዘመናዊ የግብይት ስርዓት በማስገባት ከፊታችን ታህሳስ 22 ቀን 2011 ጀምሮ ምርቶቹን መቀበል የሚጀምር መሆኑን ለፋና ብሮድካስቲንግ ኮርፖሬት በላከው መግለጫ አስታውቋል።

ይህም አርሶ አደሮችን ፣ አቅራቢዎችንና ላኪዎችን ተጠቃሚ ከማድረጉ ባሻገር ለአገራችን ንግድና የውጭ ምንዛሬ እድገት ከፍተኛ አስተዋፅኦ ይኖረዋል ተብሏል።

ምርቶቹ በኢትዮጵያ ምርት ገበያ አማካኝነት መገበያየታቸውም አርሶ አደሩ ጥራት ያለው ምርት በማቅረብ የተሻለ ዋጋ እንዲያገኝ ያስችላል ነው የተባለው።

የግብይት ስርዓቱ በባንክ በኩል የሚፈፀም መሆኑም በየአካባቢው ያለውን የኢኮኖሚ እንቅስቃሴ በማነቃቃት የንግድ ዘርፉን ውጤታማ የሚያደርግ መሆኑ ተገልጿል።

ስለሆነም  ምርት ገበያው ከፊታችን ታህሳስ 22 ቀን 2011 ዓ.ም ጀመሮ የአኩሪ አተር ምርት አቅራቢዎችን በአዲስ አበባ(ሳሪስ)፣አሶሳ ፣ፓዊ፣ቡሬ፣ነቀምትና ጎንደር በሚገኙት ቅርንቻፎቹ መረከብ የሚጀምር መሆኑን አስታውቋል።

የሽምብራ ምርት አቅራቢዎችን ደግሞ በኣዲስ አበባ(ሳሪስ)፣አዳማ፣ቡሬ፣ኮምቦልቻና ጎንደር በሚገኙ ቅርናጫፎቹ መረከብ የሚጀምር መሆኑ ነው የተገለፀው።

 

You might also like
Comments
Loading...