Fana: At a Speed of Life!

ሉካ ሞድሪች የ2018 የባሎንዶር አሸናፊ ሆነ

አዲስ አበባ ፣ ህዳር 25 ፣ 2011 (ኤፍ ቢ ሲ) ክሮሺያዊው አማካይ ሉካ ሞድሪች የባሎንዶር ሽልማትን አሸነፈ።

ቀጭኑ አማካይ ከ10 አመት በኋላ ለመጀመሪያ ጊዜ በክርስቲያኖ ሮናልዶ እና ሊዮኔል ሜሲ መካከል ሰብሮ በመግባት አሸናፊ መሆን ችሏል።

ክሮሺያዊው አማካይ ከሶስት ሳምንታት በኋላ በሚጠናቀቀው 2018 ከክለቡ ሪያል ማድሪድ እና ከሃገሩ ጋር ስኬታማ የውድድር ጊዜን አሳልፏል።

በነጮቹ ቤት በቻምፒየንስ ሊጉ ለሶስተኛ ተከታታይ ባለ ድል ሲሆኑ የሞድሪች አስተዋጽኦ ላቅ ያለ ነበር።

ከዛ መልስ በሩሲያ በተካሄደው የዓለም ዋንጫ ደግሞ የክሮሺያን መሃል ሜዳ በአግባቡ እየመራ ሃገሩን ለፍጻሜ አድርሷል።

በቻምፒየንስ ሊጉም ሆነ በዓለም ዋንጫው ሞድሪች ውጤታማ ግልጋሎትን በመስጠት አስደሳች ጊዜን አሳልፏል።

ይህን ተከትሎም ለ10 አመታት ሮናልዶ እና ሜሲ ተቆጣጥረውት የነበረውን የባሎንዶር አሸናፊነት ማግኘት ችሏል።

ሞድሪች በሩሲያው የዓለም ዋንጫ የኮከብ ተጫዋችነት ሽልማትን ያሸነፈ ሲሆን፥ የፊፋ የአመቱ ምርጥ ተጫዋችነት ሽልማትንም በክረምቱ ማሸነፉ ይታወሳል።

የቀድሞው የኤሲ ሚላን እና ብራዚል ኮከብ ካካ በ2007 ባሎንዶርን ካሸነፈ በኋላ ክርስቲያኖ ሮናልዶ እና ሊዮኔል ሜሲ ሽልማቱን የግላቸው አድርገውት ቆይተዋል።

ላለፉት 10 አመታትም በመካከላቸው ማንም ሳይገባ እየተፈራረቁ ሽልማቱን ሲወስዱ ቆይተዋል።

ፖርቹጋላዊው ክርስቲያኖ ሮናልዶ የቀድሞ የክለብ አጋሩን ተከትሎ 2ኛ ሲሆን፥ ሊዮኔል ሜሲ ደግሞ ከደረጃ ውጭ 5ኛ በመሆን አጠናቋል።

ፈረንሳዊው ኪሊያን ምባፔ ደግሞ የአመቱ ምርጥ ወጣት ተጫዋችነት ሽልማትን ማሸነፍ ችሏል።

ፈረንሳዊው አንቷን ግሬዝማን በባሎን ደ ኦር 3ኛ ሲሆን ምባፔ 4ኛ በመሆን አጠናቋል።

ሞሃመድ ሳላህ፣ ራፋኤል ቫራን፣ ኤዲን ሃዛርድ፣ ኬቪን ደ ብሩይነ እና ሃሪ ኬን ከ6 እስከ 10ኛ ባለው ደረጃ የገቡ ሌሎች ተጫዋቾች ናቸው።

በሴቶቹ ደግሞ የሊዮን እና ኖርዌይ አጥቂዋ አዳ ሄገርበርግ የዘንድሮው አሸናፊ ሆናለች።

You might also like
Comments
Loading...